FIER– Një 49-vjeçar i identifikuar me inicialet R.K është vënë në prangat e Policisë së Fierit mbrëmjen e kësaj të shtune pasi ka plagosur me armë zjarri bashkëshorten e tij. Policia bën me dije se pasi qëlloi me pistoletë gruan, 28-vjeçaren e identifikuar me inicialet N.F ai u largua nga vendi i ngjarjes. Falë ndërhyrjes në kohë dhe rrethimit të zonës është bërë i mundur arrestimi i tij. Ndërsa e plagosura ndodhet në spital nën kujdesin e mjekëve.
Mbrëmja e sotme nuk ka pasur qetësi pasi një ngjarje tragjike u regjistrua në Maliq, ku një burrë mbyti me çarçaf gruan e tij dhe më pas ia hodhi trupin në kanalin e ujërave të zeza, ku u gjet më pas nga nëna e saj. Autori vijon të jetë në arrati.
NJOFTIMI I POLICISË:
Plagosi me armë zjarri bashkëshorten dhe u largua nga vendngjarja, falë reagimit në kohë të Policisë, kapet dhe vihet në pranga autori. Pas njoftimit të marrë se në lagjen “Sheq i Madh” ka ndodhur një plagosje me armë zjarri, shërbimet e Policisë kanë shkuar menjëherë në vendngjarje dhe nga veprimet e para hetimore, rezultoi se shtetasi R. K., 49 vjeç, pas një konflikti me bashkëshorten e tij, shtetasen N. F., 28 vjeçe, e ka plagosur atë me armë zjarri pistoletë dhe është larguar. Shërbimet e Policisë janë vënë në ndjekje të autorit, kanë rrethuar zonën dhe falë veprimeve të shpejta operacionale, pas disa minutash, bënë të mundur kapjen dhe arrestimin në flagrancë të tij. U sekuestrua në cilësinë e provës materiale arma me të cilën shtetasi R. K. plagosi bashkëshorten e tij. Shtetasja N. F. ndodhet në spital, në kujdesin e mjekëve. Grupi hetimor ndodhet në vendngjarje dhe në bashkëpunim me Prokurorinë vijon punën për sqarimin e plotë të rrethanave të ngjarjes.
