CEFTA dhe WB6 CIF bashkohen për fuqizimin e zërave të bizneseve

Bruksel, 27 prill 2024 – Me qëllim të përmirësimit të bashkëpunimit me bizneset dhe fuqizimit të rolit të tyre në integrimin ekonomik rajonal, Sekretariati i CEFTA-s dhe Forumi i Investimeve i Dhomave të Ballkanit Perëndimor 6 (WB6 CIF) sot nënshkruan një Memorandum Mirëkuptimi (MM) në Bruksel. Kjo marrëveshje hedh themelet për bashkëpunim të zgjeruar dhe shkëmbim të informacionit që do të nxisë krijimin e një tregu të përbashkët rajonal nën ombrellën e Procesit të Berlinit.
Në këtë mënyrë, të dyja organizatat demonstrojnë përkushtimin e tyre për promovimin e rrjedhave efikase tregtare ndërmjet Palëve të CEFTA-s dhe nxitjen e integrimit ekonomik rajonal. Duke bashkërenduar përpjekjet, Sekretariati i CEFTA-s dhe WB6 CIF synojnë të mbështesin zbatimin në kohë dhe efektiv të Planit të Veprimit të Tregut të Përbashkët Rajonal dhe Planit të Ri të Rritjes për Ballkanin Perëndimor, duke rritur më tej përafrimin me Bashkimin Evropian.
“Bizneset duhet të vazhdojnë të shohin përmirësime reale në terren çdo ditë, dhe për ta arritur këtë, partneritete të forta, si ai që kemi pasur me Sekretariatin e CEFTA-s për vite, janë kyçe. Ne përgëzojmë punën e tyre në lehtësimin e tregtisë, dhe presim të vazhdojmë të zgjerojmë bashkëpunimin tonë, në mënyrë që të kemi tregti më të shpejtë dhe më efikase në rajon”, ka thënë Lulzim Rafuna, Kryetar i WB6 CIF.
Elementet kryesore të këtij bashkëpunimi përfshijnë fuqizimin e dialogut publiko-privat, promovimin e lehtësimit të tregtisë, mbështetjen e digjitalizimit dhe organizimin e ngjarjeve të përbashkëta për të rritur dukshmërinë e proceseve reformuese që promovojnë një treg të unifikuar, si dhe destinacionin e investimeve në Ballkanin Perëndimor.
“Bashkë jemi më të fortë në investimin e përpjekjeve jo vetëm në promovimin e tregtisë së mallrave dhe shërbimeve, por edhe në fuqizimin e zërave të bizneseve tona në Ballkanin Perëndimor. Duke integruar nevojat dhe sfidat e tyre në politikat dhe nismat tona, ne po nxisim një mjedis vërtet të orientuar drejt biznesit. Ky është një bashkëpunim që qëndron me bizneset, për bizneset, prandaj, ne jemi të përkushtuar për krijimin e mundësive të reja dhe për të nxitur ndryshime pozitive për bizneset dhe njerëzit në të gjithë Ballkanin Perëndimor” ka thënë Ushtruesja e detyrës së drejtoreshës së CEFTA-s, Danijela Gaqevic.
Përfaqësuesit e të dyja organizatave njohën potencialin e këtij bashkëpunimi për Ballkanin Perëndimor, duke parashikuar përfitime të ndërsjella përmes përpjekjeve të përbashkëta dhe ekspertizës së përbashkët gjatë katër viteve të ardhshme.