TIRANË– Është shtyrë këtë të mërkurë nga Kreu i Komisionit Qendror të Zgjedhjeve (KQZ), Ilirjan Celibashi miratimi i fondeve vjetore për partitë politike. Shtyrja bëhet pasi në 31 mars është afati i fundit për dorëzimin e raporteve financiare vjetore. Celibashit tha se do të shikohet kush parti sjell raportet, pasi sipas ligjit nëse nuk dorëzohen raportet financiare, partitë nuk përfitojnë fonde për vitin pasardhës.
KQZ një javë më parë bëri me dije se fondi vjetor që do të përfitojnë partitë politike do të jetë 345 milionë lekë.
Partia Socialiste si fituese e zgjedhjeve, me 74 mandate do të përfitojë nga KQZ pothuajse 151 mln lekë. Partia Demokratike do të marrë rreth 103 milionë lekë. Fondi do të kalojë në llogarinë bankare të PD që aktualisht administrohet nga Gazmend Bardhi. Ndërkohë fondi për fushatën zgjedhore do ndahet në fund të muajit mars.
