KUKËS– Detaje të reja kanë dalë në dritë nga ngjarja e rëndë e ndodhur në orët e para të mëngjesit ku 30-vjeçari Visar Cengu u vra me armë nga Dibran Hoxha dhe i plagosur mbeti shoku i tij Rufgen Shehu. Ai po merr ndihmë mjekësore në spitalin e Kukësit ku drejtori i të cilit ka dhënë detaje në emisionin “Frontal” të T7. Sulejman Sokoli tha se rreth orës 04:30 në spitalin e Kukësit është paraqitur një veturë për të kërkuar ndihmë, derisa shtoi se i ndjeri ka shkuar pa shenja jetë, ndërsa i plagosuri tjetër u dërgua për mjekim më të specializuar në spitalin e Tiranës.
“Në orën 4:30 është paraqitur një makinë për të kërkuar ndihmë mjekësore, njëri është konstatuar i vdekur ndërsa tjetri ka ardhur i plagosur në këmbën e djathtë. Ai pas dhënies së ndihmës së parë, është dërguar në Tiranë… Është jashtë rrezikut për jetë… Viktima ka ardhë pa shenja jete, pastaj është njoftuar Policia dhe organet kompetente,”, tha Sokoli.
30-vjeçari Visar Cengu u qëllua për vdekje në orët e para të mëngjesit nga Hoxha. Shkak për sherrin dyshohet se është bërë refuzimi për pagesën e faturës 400 euro nga të rinjtë nga Kukësi. Sipas dëshmitarëve në vendin e ngjarjes në fillim ata janë zënë me grushte. Pasi Cengu me miqtë e tij kanë dalë nga lokali, Dibran Hoxha ka dalë po ashtu dhe ka hapur zjarr ndaj tyre. Cengu ndërroi jetë pak minuta pasi u largua me urgjencë nga vendi i ngjarjes ndërsa një nga shokët e tij u plagos, tjetrin fatmirësisht nuk e preken plumbat. Bashkë me Hoxhën në polici janë shoqëruar dhe 5 persona të tjerë që dyshohet të kenë lidhje me ngjarjen.
