Këtë të hënë fillon regjistrimi i popullsisë në nivel kombëtar. Regjistrimi i cili skanon numrin e popullatës reale gjatë kësaj periudhe që ndodhen në Shqipëri do të zgjasë për 6 javë. Censusi 2023 është ngjarja më e rëndësishme statistikore e vendit, dhe në të do të përfshihen mbi 7 mijë e 500 anketues, mbikëqyrës dhe kontrollorë të trajnuar.
Autoritetet e Institutit të Statistikave bëjnë me dije se në total janë rreth 100 pyetje të hartuara në tetë module, të cilat do të synojnë mbledhjen e informacionit në lidhje me moshën, vendlindjen, numrin e anëtarëve të familjes, arsimimin, shëndetësinë, punësimin, kushtet e jetesës, etninë, besimin fetar dhe gjuhën.
Por në këtë anketim, deklarimi i besimit fetar është me alternativë. Besimet kryesore fetare në Shqipëri përmes deklaratave zyrtare dhe rrjeteve sociale i bëjnë thirrje besimtarëve të deklarojnë përkatësinë e tyre fetare përballë anketuesve.
Komuniteti Mysliman i bën thirrje dashamirëse të gjithë besimtarëve, qofshin praktikantë ose jo, të deklarojnë përkatësinë e tyre fetare. “Deklarojeni me krenari besimin tuaj dhe sigurohuni që regjistruesi ta hedhë saktë në tabelën elektronike, ashtu siç ju e deklaroni”, saktëson deklaratat e tyre.
Thirrje të njëjtë kanë bërë edhe drejtuesit e Kishës Ortodokse. Ata përmes një video kanë treguar mënyrën se si do të anketohen dhe i kërkojnë besimtarëve të deklarojnë besimin e tyre dhe mënyrën se si duhet të kontrollojnë nëse u shkrua saktë në tabelën elektronike të anketuesve.
Ndërsa drejtuesit e Besimit Katolik i kanë ftuar besimtarët e besimit të tyre të tregojnë përkatësinë e tyre fetare. Përmes një komunikimi publik ata i udhëzojnë që në pyetjen 168 të modulit të parë, të përgjigjen me po dhe në vijimin e pyetjes 169 të po këtij moduli, të deklarojnë se janë të krishterë katolikë.
Censi i Popullsisë dhe Banesave 2023 është i 12-ti, që kur Shqipëria u shpall shtet i pavarur në vitin 1912, ndërsa numërimi i parë u krye në vitin 1923.
