TIRANE- Ish-ministri i Mbrojtjes, Fatmir Mediu do të dalë përpara Gjykatës së Posaçme kundër Korrupsionit dhe Krimit të Organizuarë më datë 8 mars 2023 për të zhvilluar seancën paraprake, ku është marrë i pandehur nga SPAK për dosjen e shpërthimit në Gërdec. Gjyqtarja e çështjes mësohet se është Irena Gjoka.
Pse akuzohet Fatmir Mediu?
Mediu akuzohet nga SPAK si një nga ish zyrtarët përgjegjës për tragjedinë e Gërdecit, me 26 të vrarë dhe qindra të plagosur. Gjykata e Lartë vendosi t’ia dërgojë këtë çështje për kompetencë GJKKO-së, me arsyetimin se me ndryshimet e fundit ligjore në kuadër të reformës në drejtësi, i takon asaj ta shqyrtojë dosjen penale ndaj ish-zyrtarit të lartë. Apeli i GJKKO vendosi hapjen e çështjes duke marrë të pandehur ish-ministrin. Ndërkohë Mediu ka dorëzuar rekursin në Gjykatën e Lartë ku kundërshton vendimin e Gjykatës së Apelit të Posaçëm duke pretenduar se vendimi i Apelit është antikushtetues. Sipas avokatëve të tij, ky vendim cënon parimin e gjësë së gjykuar, sa kohë një kërkesë për rigjykim është rrëzuar më herët nga Gjykata e Tiranës dhe Apeli i saj.
