Çështja “Gërdeci”/ Mbahet sot seanca për ish-ministrin Fatmir Mediu

Ditën e sotme do të mbahet seanca gjyqësore për ish-ministrin e Mbrojtjes, Fatmir Mediu për shpërthimin e Gërdecit. Avokatët e ish-ministrit në seancën e fundit gjyqësore të zhvilluar kërkuan heqjen dorë nga gjykimi i shkurtuar, por gjykata u shpreh se këtë kërkesë ka të drejtë ta bëjë vetëm i pandehuri. Mediu akuzohet për shpërdorim detyre të kryer në bashkëpunim më zinxhirin komandues ushtarak. Shpërthimi i 15 marsit të vitit 2008 në fabrikën e demontimit të municioneve në Gërdec shkaktoi 26 të vrarë. Ky shpërthim, sipas avokatëve nuk ishte aksident dhe mendohet se dikush ka ndezur një zjarr të qëllimshëm brenda depos së demontimit të armëve. Në gjykimin e zakonshëm avokatët kanë bërë me dije se do të kërkojnë ekspertizë të re për shkaqet e këtij shpërthimi dhe do të pyesin edhe dëshmitarë të cilët nuk janë pyetur më herët, po ashtu edhe personat ndaj të cilëve ka përfunduar hetimi.