TIRANË– Kryetari i Partisë Demokratike Sali Berisha është shprehur i kënaqur sa i përket gjithë procesit të primareve në Partinë Demokratike. Sipas tij për asnjë nga 200 kandidatët në garë nuk mund të thonë se ishte kandidat i kryetarit pasi të gjithë janë zgjedhur nga anëtarësia. I ashpër u trregua me të majtët. Kreu i selisë blu u shpreh se në Partinë Socialiste jo vetëm që nuk ka zgjedhje por se është kthyer në origjinë.
‘Edhe njëherë theksoj se procedura e sotme dhe primaret, shënojnë gjithashtu hapjen e vërtetë, reale, institucionale të PD-së. Në garë morën pjesë mbi 200 kandidatura, por nuk ka një prej tyre që të thotë se mora pjesë si kandidat i kryetarit apo kryesisë së PD. Jo, që të gjitha pa përjashtim si vullnet i lirë i demokratëve apo vetë kandidatëve. Imagjinoni për një moment, këtë gjallëri, aktivitet, transparent publik para medieve dhe shqiptarëve, në zhvillimet në skutat mafioze të partisë tjetër, tek e cila siç e dini, njëlloj si në ligjin e mafias nuk pipëtin asgjë. Qytetarët shqiptarë nuk kanë as edhe një ide, të dhënë seç ndodh brenda atij bodrumi, apo shpelle, përveç klithmat prokolalike të përditshme, nga mëngjesi deri në darkë të asaj force politike që gjithçka mund të jetë, por jo demokratike, tepër e rrezikshme për të ardhmen e vendit që quhet PS, por tashmë e kthyer në origjin^, tha Berisha.
