VLORË– Një drejtues automjeti është gjobitur me 75.000 lekë të rinj nga policia rrugore dhe i është hequr patenta pasi ka kryer manovra të rrezikshme në qendër të banuar. Bazuar pamjet filmike që tashmë janë vënë nën sekuestro nga Policia e Shtetit, automjeti shikohet që kryen manovra duke u kthyer kështu në burim aksidenti dhe rrezik për këmbësorët. Sipas shërbimit të Sektorit të Policisë Rrugore në DVP Vlorë, pas shoqërimit në komisariat, ka rezultuar se ky shtetas e drejtonte automjetin, pa siguracion dhe pa kryer kontrollin teknik.
NJOFTIMI I POLICISË:
DVP Vlorë
Kreu manovra të rrezikshme në rrugë, në zonë të banuar, drejtuesit të automjetit i tërhiqet leja e qarkullimit dhe ndëshkohet me masën administrative 75.000 lekë të rinj.
Bazuar në disa pamje filmike, në të cilën shfaqet një drejtues automjeti, duke kryer manovra të rrezikshme (drift) me automjet, duke u kthyer në burim aksidenti dhe rrezik për përdoruesit e tjerë të rrugës, shërbimet e Sektorit të Policisë Rrugore në DVP Vlorë bënë të mundur identifikimin e drejtuesit dhe shoqërimin e tij.
Në përfundim të veprimeve, shërbimet e Sektorit të Policisë Rrugore të DVP Vlorë i kanë terhequr lejen e qarkullimit, drejtuesit të automjetit, shtetasit D. Xh., si dhe e kanë ndëshkuar atë, me masën administrative 75.000 lekë të rinj, pasi ka drejtuar automjetin me shpejtësi mbi normat e lejuara, në qendër të banuar dhe ka kryer manovra të rrezikshme, në kundërshtim me Kodin Rrugor.
Pas shoqërimit në komisariat, rezultoi se ky shtetas e drejtonte automjetin, pa siguracion dhe pa kryer kontrollin teknik.
Drejtoria Vendore e Policisë Vlorë fton të gjithë qytetarët që të denoncojnë çdo rast të paligjshmërisë, duke u siguruar reagim të shpejtë dhe të paanshëm, kundrejt atyre që shkelin ligjin dhe cenojnë jetën e qytetarëve.
