Një aksident i frikshëm me pasojë dy të plagosur ka ndodhur këtë pasdite në kryeqytet, në rrugën “Ismail Qemali”, pranë Kryeministrisë.
Një automjet tip “Mercedes Benz” ka humbur kontrollin dhe është ngjitur mbi trotuar duke përplasur dy vajza kalimtare.
Të dyja janë dërguar në spital, ndërkohë që raportohet se një prej vajzave është në gjendje të rëndë shëndetësore. Në automjetin tip “Mercedes Benz” udhëtonin dy djem.
Pas aksidentit policia arrestoi drejtuesin e automjetit, 21-vjeçarin Jorgaq Thengjilli, për shkeljen e rregullave të qarkullimit rrugor.
“Ndërsa drejtonte mjetin me targa AA 528 PY, Jorgaq Thengjilli ka humbur kontrollin për shkak të shpejtësisë ka përplasur dy këmbësore D. K., dhe K. D., në rrugën “Ismail Qemali”. Të lënduarat janë dërguar në spitalin e Traumës dhe janë nën kujdesin e mjekëve“, njofton policia.
Nga testi i alkoolit me aparat “Drager”, rezultoi se drejtuesi i mjetit nuk ishte nën ndikimin e alkoolit apo të drogës.
Ai më parë është ndëshkuar për tejkalim shpejtësie në zona të banuara.
Konkretisht ne korrik të këtij viti është kapur në zonën e Yzberishit me shpejtësi dhe është ndëshkuar me gjobë 10 mijë lekë të reja.
/ Newszone
