UKRAINË– Një ngjarje e pazakontë është regjistruar në qiellin e kryeqytetit të Ukrainës, Kievi këtë të enjte. Raportohet se ky fenomen ka shkaktuar sinjalin e alarmit ajror nga frika e një sulmi të ri rus. Kjo ka shkaktuar panik dhe tek qytetarët e po ashtu ka vënë në gatishmëri dhe ushtrinë në Kiev. Sipas kreut të administratës ushtarake Serhiy Popko, paralajmërimi ajror i dëgjuar në Kiev është për shkak të “rënies së një sateliti hapësinor të NASA-s”.
Nga ana tjetër agjensia hapësinore e ka mohuar që objekti i paidentifikuar të jetë një nga satelitët e tyre. NASA ka shpjeguar se sateliti në fjalë është ende në orbitë. Forcat Ajrore të Ukrainës spekuluan se objekti i ndritshëm mund të ishte një meteorit, duke mohuar hipotezën e konsideruar fillimisht më të besueshme, pra një sulm me raketa ruse.
