TIRANË– Dhjetë persona kanë rënë në prangat e policisë së Tiranës gjatë 24 orëve të fundit. Blutë e kryqytetit bëjnë me dije se tre persona janë arrestuar për kundërshtim të punonjësit të policisë si dhe për kanosje, ndërsa një tjetër është arrestuar për vjedhje. Po ashtu raportohet se një 45-vjeçare e identifikuar me inicialet Sh.K është larguar nga banesa dhe asnjë nga familjarët e saj nuk ka dijeni për vendndodhjen. Denoncimin për zhdukjen e saj në polici e ka bërë bashkëshorti. Ndërkohë 3 persona janë arrestuar pasi janë kapur në flagrancë duke drejtuar mjetin në gjendje të dehur.
NJOFTIMI I POLICISË:
Tiranë/Vihen në pranga 10 shtetas, për vepra të ndryshme penale. Specialistët për Hetimin e Krimeve të Komisariatit të Policisë Nr. 1 arrestuan shtetasin A. G., 23 vjeç, banues në Tiranë, pasi gjatë kontrollit fizik iu gjet një dorezë metalike (përforcues grushti), e cila u sekuestrua në cilësinë e provës materiale.
Specialistët për Hetimin e Krimeve të Komisariatit të Policisë Nr. 3 arrestuan shtetasit: – D. M., 32 vjeç, banues në Tiranë, pasi ka kundërshtuar 3 punonjës policie, të cilët kishin shkuar në dyqanin e shtetasit K. B., në rrugën “Gjergj Legisi”, pas njoftimit se shtetasi D. M. po dëmtonte kompjuterat në këtë dyqan; – I. D., 60 vjeç, banues në Tiranë, pasi në rrugën “Jordan Misja”, gjatë një konflikti për motive të dobëta, ka goditur shtetasin A. J., 54 vjeç, i cili si pasojë është dëmtuar dhe ndodhet nën kujdesin e mjekëve.
Gjithashtu, nga këto struktura u ndalua shtetasi L. H., 26 vjeç, banues në Kosovë, pasi ka vjedhur në një argjendari në rrugën “Sami Frashëri”. Specialistët për Hetimin e Krimeve të Komisariatit të Policisë Kavajë arrestuan shtetasin G. P., 28 vjeç, banues në Durrës, pasi në mënyrë të vazhdueshme ka përndjekur dhe kanosur ish-bashkëjetuesen e tij. Specialistët e Qarkullimit Rrugor arrestuan një të mitur 17 vjeç, pasi u kap duke drejtuar një automjet, pa leje drejtimi.
Gjithashtu, specialistët e Qarkullimit Rrugor arrestuan shtetasit: – E. P., 30 vjeç, banues në Tiranë, pasi duke drejtuar automjetin, ka aksidentuar shtetasin O. H., 80 vjeç, i cili ndodhet në spital, nën kujdesin e mjekëve; – Sh. H., 26 vjeç, banues në Tiranë, pasi u kap duke drejtuar automjetin, pa leje drejtimi; – B. K. (S)., 27 vjeç, banues në Tiranë, pasi u kap duke drejtuar automjetin, në gjendje të dehur.
—
Në Komisariatin e Policisë Nr. 3 është paraqitur shtetasi Sh. K., 45 vjeç, banues në Tiranë, i cili ka kallëzuar se është larguar nga banesa, bashkëshortja e tij. Punohet për gjetjen e saj. Materialet i kaluan Prokurorisë, për veprime të mëtejshme procedurale.
