Fondi Shqiptar i Zhvillimit njihet për tenderat e tij të çuditshëm. Pas krijimit të menysë ushqimore të 100 fshatrave turistik institucioni i drejtuar nga Dritan Agolli godet sërish: Projekti i 100 fshatrave është kanalizues i mirë i fondeve me ide të çuditshme.
Rreth 800 mijë euro do të harxhojë FSHZH në një tender ku përfshihen “Studime, analiza, Masterplane. (Produkt). Mbështetje me ekspertizë për bashkitë për regjistrimin fillestar, përmirësimin e regjistrit të pasurive të paluajtshme në territorin e fshatrave me potencial turistik.”
Në dokumentat e tenderit të cilat i disponon Newszone.al thuhet se qëllimi është të ofrohet një mbështetje shumëdimensionale për pushtetin vendor.
“Synon të ofrojë mbështetje shumëdimensionale qeverisjes vendore përmes mbështetjes me ekspertizë të kualifikuar shumë planëshe: Specifikisht në rastin e kësaj Marrëveshjeje Kuadër synohet të mundësohet realizimi i procesit të regjistrimit fillestar sistematik të pasurive të paluajtshme brenda një kohe të shkurtër dhe sipas procedurave ligjore për t’i hapur rrugë investimeve publike dhe private në territore me potencial turistik.
Financimi i këtij projekti do të mundësojë regjistrimin fillestar apo përmirësim/përditësimin e pasurive te paluajtshme dhe pajisjen me dokumentacionin ligjor të pasurive të paluajtshme si; truall, tokë bujqësore, ndërtesa apo pasurive në lartësi.”-thuhet në dokumentat e tenderit.
Pjesë e kësaj procedure do jenë bashkitë si dhe Agjencia e Kadastrës me të cilët firma që do fitojë tenderin ku të gjithë do të bashkërendojnë punën për të arritur qëllimin.
Por pyetja që ngrihet në këtë rast është se përse duhet të harxhohen rreth 800 mijë euro për një periudhë dyvjeçare kur kjo punë mund të kryhej nga institucionet shtetërore që kanë interes si bashkitë dhe Kadastra që kanë të gjithë informacionin dhe dokumentacionin për çdo pronë në këtë vend?
Tenderi për menynë ushqimore e 100 fshatrave turistik u bë subjekt i hetimit nga prokuroria speciale SPAK pasi kishte dyshime se fituesi kishte lidhje me djalin e drejtorit të Fondit Shqiptar për Zhvillim, duke qenë se punonte si kuzhinier në restorantin e djalit të drejtorit të FSHZH-së, Dritan Agolli.
Ende nuk është bërë publike një vendimmarrje e prokurorisë për këtë rast./ Ekskluzive e Newszone.al
