TIRANË– Ish-kryebashkiaku i Durrësit Vangjush Dako, i arrestuar nga Prokuroria e Posaçme Kundër Korrupsionit dhe Krimit të Organizuar për shpërdorim detyre dhe falsifikim i dokumenteve ka apeluar vendimin e Shkallës së Parë të GJKKO-së që e la në burg. Mësohet se këtë të mërkurë avokati i Vangjush Dakos i është drejtuar Apelit të Posaçëm që të ndryshojë vendimin e dhënë nga gjyqtari Erion Bani që e la në qeli. Ende nuk është hedhur shorti në apelin e GJKKO-së për të caktuar gjyqtarin dhe datën se kur do të shqyrtohet kërkesa e ish-kryebashkiakut.
Akuzat që çuan në pranga Vangjush Dakon
Rasti i parë: Ish-kryebashkiaku i Durrësit Vangjush Dako dhe nëntë bashkëpunëtorët e tij në bashki, të cilët po ashtu janë vënë në pranga nga Prokuroria e Posaçme Kundër Korrupsionit dhe Krimit të Organizuar akuzohen për ‘shpërdorim detyre’ dhe ‘falsifikim dokumentesh’. Kjo akuzë ka të bëj me një pallat që u nis me 7 kate në 2010 dhe përfundoi 11 kate në vitin 2014. Ky pallat për shkak se nuk ishte bërë kontrolli sizmik nuk arriti që të përballonte tërmetin në vitin 2019 dhe u dëmtua. Për këtë u arrestua dhe ndërtuesi i pallatit Fiqiri Farruku. Lidhur me këtë rast SPAK ka vënë në akuzë ish-kryebashkiakun Vangjush Dakon, Drejtorin e Drejtorisë së Kontrollit dhe Planifikimit të Territorit Adhurim Qehajaj. Arkitektin Ermal Lama, projektuesen Meri Semini topografët Fatmir Ejupi dhe Adrian Bulku.
Rasti i dytë ka të bëjë me një tender të datës 25 mars 2014 për shërbim konsulence, sigurimin e një projekti të quajtur “Projektim zbatim për Promenadën Bregdetare dhe Plazhin publik nga Bërryli deri në Currila”. Për këtë akuzohen Vangjush Dako dhe grupi punës i përbërë nga, Adhurim Qehajaj, Diana Dedja, Adnan Toçila, anëtarë të cilët kanë patur si detyrë, përcaktimin e termave të referencës dhe fondin limit. Fondi limit i tenderit në fjalë ishte 21 milionë lekë, por për shkak të një gabimi në sipërfaqen e projektit, ku u ndryshua nga 2.04 hektarë në 20.4 hektarë, vlera arriti në 210 mln lekë.
