TIRANË– Detaje të reja janë zbardhur në lidhje me vrasjen e biznesmenit Ardian Nikulaj në Shëngjin disa ditë më parë. Raportohet se një makinë e re ka dalë në skenën e policisë. Bëhet fjalë për një meti tip “Volsvagen”, i cili rezulton i marrë me qira në Shkodër. Ora News shkruan se ky automjet është marrë me qira dhe është përdorur para vrasjes së biznesmenit nga autori i krimit. Automjeti i drejtuar nga autori i krimit ka lëvizuar nga Shkodra në drejtim të Shëngjinit.
Lëvizja me këtë mjet është kryer gjatë paradites, ku autori sapo ka zbarkuar në Shëngjin ka parkuar dhe më pas ka marrë motorin dhe veshjen e përshtatshme me të cilën kreu vrasjen në lokal. Hetuesit janë duke verifikuar dokumentacionin e qiramarrjes së mjetit me qëllim identifikimin e përdoruesit të saj. Ndërkohë të dhënat e mbledhura deri më tani kanë zbuluar se autori e ka pritur biznesmenin të paktën dy orë.
Më konkretisht nga dinamika e lëvizjes së autorit ai është fiksuar në orën 11.30 minuta dhe deri në orën 13.30 kur ndodhi edhe ngjarja e rëndë. Pas krimit vrasësi dyshohet se ka lëvizur me motor, duke përshkuar rrugën deri në Bushat. Deri më tani në dyshimet e policisë lidhen me një shtetas anglez, i cili rezulton i dyshimtë pasi menjëherë pas ngjarjes është larguar nga vendi përmes Rinasit. Pavarësisht largimit të tij, hetuesit i kanë përgatitur disa pyetje të cilat do ti drejtohen policisë dhe prokurorisë britanike me kërkesën për marrjen në pyetje të shtetasit të anglez. Nga kqyrja e sistemit TIMS rezulton se kjo ishte vizita e tij e parë e qëndrimit të tij në vendin tonë ku ishte vendosur në zonën e Shëngjinit, pikërisht pranë Bar-Restorant “Coral” ku ndodhi edhe vrasja e biznesmenit.
Biznesmeni u ekzekutua me shtatë plumnba në kokë e trup mesditën e 19 prillit teksa konsumonte kafen në ambientet e lokalit të tij “Coral” në bulevardin e Shëngjinit, shumë pranë plazhit. Autori i maskuar me maskë anti-covid dhe skafandë ka hyrë në ambientet e restorantit nga dera e pasme dhe pasi e ka përshëndetur viktimën për tu siguruar mirë që bëhej fjalë për të njëjtin person e ka ekzekutuar duke e lënë të vdekur në vend. Më pas është larguar sërish nga dera e pasme ku kishte lënë dhe motorin e përdorur në krim. Në lokal në momentin e ngjarjes ka qenë banakieri dhe bashkëshortja e Nikulajt, e cila ndodhej në ambientet e kuzhinës ndërsa shumë pranë viktimës ishte vjehrri i tij. Deri më tani nuk ka asnjë pistë konkrete ku policia e Lezhës të fokusohet. Por një nga pistat më kryesore është ajo e gjakmarrjes pasi rezulton se Ardian Nikulaj është akuzuar vite më parë se është i përfshirë në vrasjen e dy pjestarve të familjes Balaj. Për këtë Nikulajt i është vrarë dhe një vëlla nga fisi Balaj. Ardian Nikuluaj ishte një person i angazhuar dhe në jetën politike përveç biznesit. Ai ishte anëtar i Këshillit Bashkiak të Lezhës, kandidat për deputet në listën e Partisë Social Demokrate të Tom Doshit në zgjedhkjet parlamentare të vitit 2021 dhe në zgjedhjet vendore të 14 majit synonte një karrige në Këshillin Bashkiak po nën siglen e Partisë së Doshit. Ai ishte i m rtuar dhe baba i katër fëmijëve.
