TIRANË– Të tjera detaje kanë dalë në dritë pas arrestimit të autorit të dyshuar të vrasjes së Edmond Papës në Selitë. Rezulton se Albano Velo të jetë kunati i Aleksandër Sadikajt, i cili u ekzekutua rreth 6 muaj më parë pranë TEG. Velo është i martuar me motrën e Sadikajt. Që në fillim të arrestimit të tij u përfol se vrasjen e Edmond Papës Velo ta ketë kryer për të marrë hak për Sadikajt që në fillim u raportua për një miqësi mes tyre por rezulton të kenë lidhje familjare.
27-vjeçari Aleksandër Sadikaj u ekzekutua më 11 qershor të vitit të shkuar në zonën e njohur si rrethrrotullimi i TEG-ut. Ai ishte pronar i një resorti hipizmi. Kur ishte duke udhëtuar në aksin Sauk-TEG, makina me targa AB077PO me të cilën ai po lëvizte shpërtheu. Në të ishte vendosur një sasi eksplozivi që e hodhi në erë bashkë me Sadikajn brenda. Bomba me celulare dyshohet se i është vendosur nga persona që kishin akses te makina. Nga shpërthimi Sadikaj humbi 2 gjymtyrët e poshtëm, këmbët, dhe ia doli që të dilte vetë nga makina e të dërgohej në spital, por nuk arriti t’i mbijetonte plagëve të rënda.
