LEZHË– Detaje të reja kanë dalë në dritë në lidhje me 36-vjeçarin Antonio Leka, i cili u arrestua mbrëmjen e djeshme në Lezhë me një arsenal armësh. Leka përpara se të arrestohej nga forcat Shqiponja ishte ndalur në një servis makinash ku dhe ishte veshur me rrobat ushtarake dhe me antiplumb ndërsa arma Kallashnikov qëndronte sipër bagazhit të makinës “Audi”. Ai shfaqet me plis të bardhë në kokë. E gjitha skena është zhvilluar para persona të tjerë që duket se nuk bëjnë asnjë reagim. Në fund ai rregullon sërish plisin dhe hipën në makinë ku do të arrestohej pak minuta më pas.
Para policisë ai ka thënë vetëm se është patriot dhe se ishte nisur për në Lezhë për të vrarë politikanët. Alarmin në Policinë e Lezhës e dha vëllai i Antonio Lekës dhe e ëma. Policia u vu menjëherë në lëvizje dhe bëri të mundur kapjen e tij. Në momentin e arrestimit ai nuk ka bërë rezistencë. Nëna e tij, Davë Leka rezulton të jetë një oficereje ushtrie dhe ka qenë ajo që ka thënë para policisë se armët që ka djali ishin të saja për shkak dhe të profesionit që ka.
36-vjeçari rezulton i dënuar më parë për trafik droge dhe vrasje e mbetur në tentavivë. Fqinjët trregojnë se ai është një tip i qetë, që nuk hap probleme dhe se qëndron më shumë vetëm. Ndërkohë Antonio Leksa nga Miloti rezulton se është pronar i disa dyqaneve në Lezhë, të cilat i ka përfituar pas shitjes së një trualli. Fjala “do vras politikanë” ka qenë dhe e fundit përpara se ai të “kyçte” gojën e të mos fliste më para hetuesve. Ndërkohë mësohet se ndaj tij do të kryhet dhe një ekspertizë sa i përket shëndetit të tij mendor. Policia po heton se ku i siguroi ai armët.
