TIRANË– Ngjarja e rëndë që tronditi në mesnatë Krujën ku Ramazan Sino, 29 vjeç u vra ndërsa dy nipat e tij të mitur u plagosën në oborrin e shtëpisë ka marrë vëmendjen në Komisionin e Ligjeve. Ndërkohë deklarata e bërë nga zëvendësministri i Brendshëm Besfort Lamallari se ndihet krenar për punën e ministrisë ku bën pjesë ka sjellë debate dhe përplasje mes tij, deputetes demokrate Dhurata Çupi, Asllan Dogjanit dhe kryetares socialiste të Komisionit Klotilda Bushka.
Debati:
Dhurata Çupi: A keni informacion mbi burimet radioaktive në Shqipëri? Çfarë ka të shtuar ky kontroll? Mirë që firmosim letrat, por çështja është që të kontrollojmë territorin. Mbetet në letra, apo kemi informacione për burime radioaktive?
Besfort Lamallari: Në territorin e Republikës së Shqipërisë për gjendjen materiale radioaktive, por jo bërthamore. Ato janë për qëllime dobiprurëse, për shkencën dhe mjekësinë. Rregullat dhe standardet janë të përcaktuara. Ne jemi palë tashmë. Janë dhe institucionet zbatuese, kemi dhe drejtori që përkujdesen për parandalimin dhe zbatimin e ligjit, siç është dhe ISHP. Jam krenar dhe e them me përgjegjësi. Nuk mohojmë se s’do ketë asnjëherë. Faktet janë fakte..
Klotilda Bushka: Këtu secili do flasi atë që mendon.
Dhurata Çupi: Jo atë që mendon se nuk jemi në kafe. Unë e pyeta për shifrat, nivelin e krimit sot dhe si ka qenë dhe ai më thotë jam krenar.
Asllan Dogjani: Ça krenarie?? Të vritesh në shtëpi…apo si në rastin e 13-vjeçarit që vritet te dera e shtëpisë? Që vriten dy veta në Dukagjin? Ju të vini këtu dhe të thoni; situata nuk është mirë. Këtu duhet të dihet se çfarë kërkon qytetari shqiptar. Kërkojmë të jemi të sigurt në shtëpitë tona. Po pihet drogë në shkolla. Flas si qytetar. Më vjen keq që vini këtu dhe thoni; jam krenar që pihet drogë dhe që vritet.
Dhurata Bushka: Mos paragjykoni dhe nxirrni fjalët nga konteksti.
