TIRANË– Deputeti Gazment Bardhi ka reaguar pas debatit të ashpër me kryeministrin Edi Rama sot në Kuvend. Në një postim në Facebook Bardhi shkruan se kryeministri kaloi në një gjendje robotike dhe bënte veprime të pavetëdijshme. Sipas tij është e vërtetë që ka oligarkët që në fillim janë afruar të joshin deputete dhe deputetë demokrat për të marrë votën e tyre në favor të Ardian Dvoranit për anëtar të Gjykatës Kushtetuese. Kur kjo nuk u ka ecur shkruan Bardhi atëherë ata kanë filluar me shantazhime.
“Shqetësimi që ngrita sot në Parlament është shume serioz. Dhe për shkak se është i vertetë kjo solli shpërfytyrimin e Kryeministrit, i cili prej denoncimit që bëra, kaloi ne një gjendje rrobotike, ku vetëm nxirrte fyerje teksa hapte e mbyllte shishen e ujit pavetëdijshëm. Fakti është se oligarket e tij, dhe të fortet që ka nën hyqem, kane tentuar fillimisht të joshin, më pas të shantazhojne deputetë e deputete për të siguruar vota për të derguar Dvoranin në Kushtetuese. Kjo është shumë e rendë. Tregon gjendjen e shtetit dhe demokracisë kur po hyjmë në vitin e 10 të qeverisjes së Ramës. Çfarë bënte më shumë Cosa Nostra në Itali? Ja këtë bënte. Caktonte gjykatësit e zyrtarët e lartë përmes lidhjeve politike e presionit. Kjo është drama e ketij vendi, jo fyerjet e Rames, apo perjashtimi im nga seanca. Dhe, me thoni ju, si mund t’i drejtohem ndryshe, perveçse mafioz, kur ai vetë është në dijeni të plotë të këtij operacioni. Madje, bëhet nën kujdesin e posaçëm të Kryeministrit, siç ai ka qef ti emërtojë eventet”,shkruan Bardhi në Facebook.
Gazment Bardhi dhe Edi Rama kishin sot një nga përballjet verbale më të ashpra mes tyre. Debati nisi pas akuzave që deputeti demokrat lëshoi ndaj kryeministrit, të cilin e akuzoi se kërkon të emërojë Dvoranin në Gjykatën Kushtetuese pasi ai është mercenar i tij. Bardhi shtonte edhe lidhjet e dyshimta të kreut të qeverisë me oligarkë të ndryshëm që sipas tij kanë tentuar edhe të shantazhojnë deputetët demokratë. Por duket se Ramën e “lëshuan nervat” shpejt dhe në pak minuta debat ai prevaloi në fyerje personale dhe kundërsulme që sa vinin e shtoheshin nga të dyja palët. Fjalët mafioz. legen, zagar dhe kriminel ishin nga më të përdorurra ndërkohë që i përjashtuar nga seanca doli vetëm Bardhi.
