Ministrja e Bujqësisë dhe Zhvillimit Rural, Anila Denaj si dhe ajo për Sipërmarrjen dhe Klimën e Biznesit, Delina Ibrahimaj zhvilluan sot një takim me fermerë, blegtorë e përfaqësues të agrobiznesit.
Më anë të një postimi në rrjetet e saj sociale, Denaj tregon që Skemën e Garancisë Sovrane për bujqësinë do ta sjellin sa më parë në funksion të fermerëve.
Postimi i Anila Denaj:
Bashkë me kolegen Delina Ibrahimaj, thirrëm në tryezën e diskutimit fermerë, blegtorë e përfaqësues të agrobiznesit, për të dëgjuar dhe folur mbi nevojat e tyre konkrete, me qëllim hartimin e politikave sa më efikase që i japin zgjidhje kërkesave të grupeve të interesit të investuar në këtë sektor.
Mbështetja e investimeve të sipërmarrjes bujqësore është një prioritet i ynë, për të rritur rendimentin dhe ofruar cilësi të kontrolluar në çdo hallkë të zinxhirit prodhues nga ferma në tavolinën e konsumit. Në gjithë këtë proces mbështetja financiare direkte nga buxheti i shtetit nuk do të mungojë, por ne synojmë që ajo të zgjerohet edhe nëpërmjet instrumentave të tjerë për aksesin në financë, sikundër është Skema e Garancisë Sovrane për bujqësinë për të cilën po punojmë ta sjellim sa më parë në funksion të fermerëve.
