Anëtari i Kryesisë së PD, Belind Këlliçi ka denoncuar përmes një konference për shtyp nga selia blu, lidhjet e deputetit socialist, Plarent Ndreca me inceneratorin e Tiranës. Sipas Këlliçit, Ndreca del në skenë përmes ortakut prej shumë vitesh në kompaninë e tij i cili rezulton i arrestuar dhe dënuar për krijimin e skemave mashtruese financiare.
Këlliçi tha se “në ditët në vijim do të bëjnë publike faktet sesi Ndreca ka fshehur në ILDKPI kompaninë e tij të licencuar me firmën e “shefit” dhe pronat që ai me shumë mund përpiqet të fshehë në jugun e Shqipërisë”.
Ai paralajmëroi gjithashtu se informacionet që demokratët disponojnë do t’ia dërgojnë Prokurorisë së Posaçme.
“Benn Caka ka një vëlla që quhet Ferdinand Caka i cili ka qenë ortaku në biznes prej shumë vitesh i Plarent Ndrecës. Xhuljan Caka i biri Ferdinandit, fillimisht dhe ky në moshën 20 vjeçare, ka qenë ortaku në biznes i Plarent Ndrecës, më pas është punësuar si Drejtor Juridik pranë Ujësjellës Kanalizime Tiranë, duke vazhduar në pozicionin e titullarit në sektorin e gjykatave pranë Drejtorisë Juridike në Bashkinë Tiranë, për tu punësuar më pas si Përgjegjës Sektori në Ministrinë e Brendëshme kur Plarenti ishte Sekretar i Përgjithshëm i kësaj ministrie, nga e cila mbahet mend nga çdo shqiptar për vjedhjen me tenderin famoz të uniformave të Policisë së Shtetit, aferë për të cilën Plarenti u amnistua plotësisht nga kolegët e Erionit në SPAK. Sot i takon kolegëve të Erionit në SPAK të hedhin dritë mbi faktin se përse Merila Luga, lidhje e ushtarit Plarent Ndreca të cilës ju besua drejtimi i kompanisë famoze EM CAPITAL, nuk është marrë kurrë në pyetje dhe nuk është ende nën hetim. Kompania EM CAPITAL, sipas gazetarëve që ndjekin SPAK, ka kryer disa transaksione me kompani të lidhura me Erion Veliajn, e për të cilat sot SPAK ka nisur një hetim pasuror për pronarin faktik të Inceneratorit të Tiranës“, u shpreh Këlliçi.
Deklarata
Prej më shumë se 1 viti nga kjo foltore ju kemi informuar për të gjithë gjetjet e Grupit të Ekspertëve të PD për aferën korruptive të shekullit, Inceneratorin e Tiranës dhe jo vetëm. Ju kemi informuar për të gjitha aktet flagrante dhe firmat e pronarit faktik të inceneratorit të Tiranës dhe bashkëpunëtorëve më të afërm të tij, të cilët afërmendsh nuk hetohen nga kolegët e Erionit në SPAK.
Sot do të bëjmë publik një tjetër emër të rëndësishëm, për të cilin kolegët e Erionit nuk hetojnë dhe mesa duket vijojnë detyrën e ngarkuar të fshehjes së provave flagrante të kësaj afere.
MERILA LUGA, në dukje të parë një emër i parëndësishëm, por lidhjet e saj hedhin dyshime për arsyet se përse ajo ende sot nuk është hetuar apo thërritur nga kolegët e Erionit në SPAK.
Merila Luga mban detyrën e financieres së Stela Gugalles, partneres së Mirel Mërtirit, por jo vetëm.
Në ekran do të shihni ekstraktin zyrtar të nëntorit 2022 të kompanisë famoze në pronësi të Mirel Mërtirit të regjistruar në Bullgari, EM CAPITAL.
Merila Luga sëbashku me Denisa Tollkuçin janë dy anëtaret e bordit të drejtorëve, Denisa e besuara e Mirelit dhe Klodianit si dhe zonja e dytë do të kuptohet në fund të kësaj deklarate.
Merila Luga ka për bashkëshort shtetasin Benn Caka.
Ky shtetas sipas deklaratave publike të prokurorisë së Durrësit është arrestuar dhe dënuar së bashku me shtetasin Regan Merdani për krijimin e skemave mashtruese financiare.
Regan Merdani është pjesë e skemave mashtruese të përdorura edhe në aferën e inceneratorëve, skema që ende sot i mban mend i madh e i vogël pasi nuk kishin kursyer as pleq që jetonin në azile e as ata që ishin në botën e përtejme.
Por çuditërisht Benn Caka, bashkëpunëtori i Regan Merdanit, ndalohet nga Prokuroria e Durrësit vetëm 30 ditë përpara se të kërkohej arrestimi i Klodian Zotos dhe Lefter Kokës, pikërisht për përdorimin e kësaj skeme mashtrimi financiar.
Rastësi kjo apo një veprim i bërë enkas në dijeni të plotë të SPAK për të mos përfshirë Benn Cakën, e për të lehtësuar gruan e tij e për rrjedhojë ata që e mbrojnë?!
A thua nuk e dinte gruaja që burri po bëntë evazion me punëdhënësin e saj?!
Por ecim më tej pasi Benn Caka ka një vëlla që quhet Ferdinand Caka i cili ka qenë ortaku në biznes prej shumë vitesh i Plarent Ndrecës.
Xhuljan Caka i biri Ferdinandit, fillimisht dhe ky në moshën 20 vjeçare, ka qenë ortaku në biznes i Plarent Ndrecës, më pas është punësuar si Drejtor Juridik pranë Ujësjellës Kanalizime Tiranë, duke vazhduar në pozicionin e titullarit në sektorin e gjykatave pranë Drejtorisë Juridike në Bashkinë Tiranë, për tu punësuar më pas si Përgjegjës Sektori në Ministrinë e Brendëshme kur Plarenti ishte Sekretar i Përgjithshëm i kësaj ministrie, nga e cila mbahet mend nga çdo shqiptar për vjedhjen me tenderin famoz të uniformave të Policisë së Shtetit, aferë për të cilën Plarenti u amnistua plotësisht nga kolegët e Erionit në SPAK.
Por për të plotësuar CV Xhuljan Caka është përzgjedhur edhe si trajnues i KZAZ-ve në Qarkun e Tiranës në zgjedhjet moniste të vitit 2019.
Ky është një rrjet i tërë lidhjesh të deputetit Plarent Ndreca, i cili ka patur besimin e plotë të shefit të tij politik, pasi që në vitin 2009 Erion Veliaj e përzgjodhi atë si kandidat të partiçkës G99 në qarkun e Lezhës, e më pas ushtarin e tij e promovoi fuqishëm gjatë psuhtetit të “Rilidnjes”.
Sot i takon kolegëve të Erionit në SPAK të hedhin dritë mbi faktin se përse Merila Luga, lidhje e ushtarit Plarent Ndreca të cilës ju besua drejtimi i kompanisë famoze EM CAPITAL, nuk është marrë kurrë në pyetje dhe nuk është ende nën hetim.
Kompania EM CAPITAL, sipas gazetarëve që ndjekin SPAK, ka kryer disa transaksione me kompani të lidhura me Erion Veliajn, e për të cilat sot SPAK ka nisur një hetim pasuror për pronarin faktik të Inceneratorit të Tiranës.
Të gjitha këto informacione unë do i’a përcjell Strukturës Speciale pasi ne kemi marrë zotim se kësaj çështje do ti shkojmë deri në fund dhe ta harrojë kushdo që mendon se do të zgjasë agoninë e pronarit faktik të Inceneratorit të Tiranës, se Partia Demokratike do të ndalet.
Sa për ekspertin e PS në Komisionin Hetimor të Inceneratorëve, ushtarin e mirë Plarent Ndreca, ditët në vijim do të bëjmë publike faktet sesi ai ka fshehur në ILDKPI kompaninë e tij të liçensuar me firmën e SHEFIT dhe pronat që ai me shumë mund përpiqet të fshehë në jugun e Shqipërisë.
Sërish gjej rastin të ftoj kolegët e Erionit në SPAK, që pas poshtërimit dhe përdorimit publik që ky i fundit i ka bërë, të marrin kurajo e të zbatojnë ligjin, të ngrihen në lartësinë e detyrës dhe për një moment të vetëm të ndalin luftën politike me opozitën dhe të çojnë përpara drejtësisë pronarin faktik të Inceneratorit Tiranë, kreun e Grupit të Strukturuar Kriminal 5D, i cili është kthyer tashmë në sinonimin e fjalës hajdut për çdo qytetar shqiptar.
