BRITANI– Ka qenë një seancë e vështirë ajo e djeshmja për ambasadorin shqiptar në Britaninë e Madhe Qirjako Qirko. Ai u ndesh përballë pyetjeve dhe kritikave të ashpra nga deputetët britanikë një prej të cilëve dhe Lee Anderson. Deputeti konservator pyeti ambasadorin pse shqiptarët nuk kursejnë para për të mbërritur me linja fluturimi në mënyrë të ligjshme por zgjedhin rrugët klandestine për të hyrë në Britani.
Sipas tij, ata duan të shmangin dorëzimin e të dhënave në shtetin britanik. Një tjetër pyetje lidhej me faktin se a duhet qeveria shqiptare të rimbursojë qeverinë britanike për paratë e taksapaguesve që përdoren për të strehuar shqiptarët në Britaninë e Madhe. Ambasadori Qirko tha se kjo nuk është çështje e qeverisë shqiptare.
Debati:
Lee Anderson: Ju i përshkruat vendin tuaj si një vend i ngrohtë, vend i sigurtë, një vend ku britanikët shkojnë për pushime, sot del se ata janë viktima skllavërie. Por sot shqiptarët paguajnë mijëra paundë për të mbërritur ilegalisht në Britaninë e Madhe përmes trafikantëve, kur mund të paguanin vetëm dhjetra paundë për të mbërritur me Wizz Air. Pse nuk vijnë të vizitojnë vendin fillimisht me pak para, për pushime dhe më pas mund të aplikojnë për azil?
Qirjako Qirko: Nuk e kam këtë informacion. Nuk supozoj dot pse e bëjnë këtë.
Lee Anderson: Ndoshta sepse duke mbërritur legalisht, ata regjistrojnë të dhënat e tyre dhe shteti ynë i di se kush janë? Dhe kështu, ata nuk përfshihen dot në çështje ilegale?
Qirjako Qirko: Nuk e di. Normalisht ata vijnë për shkak të ekonomisë. Përgjigjia ime është se ata nuk vijnë këtu për tu marrë me çështje të paligjshme. Ata vijnë këtu për punë.
Lee Anderson: Ata mund të vinin në mënyrë të ligjshme dhe të kërkonin azil në mënyrë të ligjshme por nuk e bëjnë. Dakord, kalojmë në një çështje tjetër. është e drejtë për qytetarët britanikë që të shpenzojnë nga taksat e tyre për të strehuar shqiptarët në hotele?
Qirjako Qirko: Nuk e di, nuk është çështja ime kjo. Nuk është përgjegjësia ime për tu përgjigjur për këtë çështje.
Lee Anderson: Ju mendoni se qeveria shqiptare duhet të kontibuojë financiarisht për këtë çështje?
Qirjako Qirko: Jo, sepse nuk është përgjegjësi e qeverisë shqiptare. Ata kanë ardhur përmes Francës si turistë normalë.
Lee Anderson: Jo, ata kanë ardhur këtu ilegalisht. Njerëzit vijnë vetë thoni ju? Flasim për vendin tuaj të ngrohtë dhe me zemër të madhe… Meqë zemra juaj është e madhe, duhet të shikoni njerëzit tuaj dhe të kontribuoni.
Qirjako Qirko: Nuk shoh arsye për të dhënë kontribut.
