Partizani do të luajë derbin ndaj Tiranës të hënën, në një sfidë ku do të kërkohet me çdo kusht fitorja. Në prag të kësaj sfide, para mediave ka folur trajneri i të kuqve, Xhovani Kolela, i cili u shpreh se ndeshja është përgatitur për tu fituar.

I pyetur për të ardhmen, Kolela deklaroi se pas ndeshjes nuk do të ketë një vendim nga ai vetë. Italiani pranoi se Tirana është me e fortë se Partizani, sa i përket menaxhimit të situatave.

Kjo është një ndeshje që përgatitet për tu fituar, por se çfarë ndodh pastaj nuk e di. Ne përgatitemi gjithmonë që të fitojmë, pastaj varet nga ndeshja. Humbja ndaj Vlaznisë nuk ishte lehtë. Ndoshta duhej pyetur çfarë u bë mirë ndaj Vllaznisë.

Drejtuesit i takoj gjithmonë jo vetëm kur fitoj dhe jo vetëm kur humbas. Thjesht pas ndeshjes ndaj Vllaznisë isha pak i nevrikosur, dhe kur jam i nevrikosur nuk jam i kthjellët ndaj vendosa që të mos flas.

Ndeshja është e rëndësishme përtej asaj si jemi ne. Derbi është gjithmonë i rëndësishëm, unë jam i fundit që kam ardhur, por sipas meje është i rëndësishëm në mënyrë të ekzagjeruar aq sa të bëjë më pak të rëndësishme ndeshjet më para. Pastaj ne kemi vështirësitë tona, do të mundohemi të bëjmë ndeshjen më të mirë të mundshme.

Tirana është padyshim më e fortë se ne, në menaxhimin e situatave, sepse është një skuadër më eksperte. Ne ndoshta ndonjëherë mund të jemi pak më brilant si skuadër. Por është një sfidë shumë e  ekuilibruar.

Mendoj se të mbërritur në këtë pikë të kampionatit, klasifikimi pasqyron atë që po ndodh. Nuk jemi në javën e 3-të, por në të 23-tën, ndaj klasifikimi flet qartë. Tirana me 40 dhe ne me 37. Kjo sa i përket Partizanit e Tiranës, ka edhe skuadra të tjera që të tjerët nuk i marrin në konsideratë, por janë ngjitur pas. E duhura është të luajmë derbin në maksimum dhe pastaj të shohim.

Unë nuk kam asnjë vendim për të marrë pas kësaj ndeshje. Ndeshjet derbi janë ndeshjet e vitit, jo se unë jam trajneri.

Në futboll si në jetë, gjërat vazhdojnë dhe është e kotë të mendojmë për Bitrin, Skukën, Xhixhën… Nëse e pyetni të njëjtën gjë trajnerin e Tiranës, do të përgjigjet në të njëjtën mënyrë. Nuk është më rasti të mendojmë për këta lojtarë të mirë që janë larguar.