DUKAGJIN-Të tjera detaje dalin në dritë nga vrasja e dyfishtë në fshatin Sumë, Njësia Administrative Pult. Nga marrja në pyetje e kushëririt të viktimave Gjokë dhe Eduard Gurra, është mësuar se zjarri i rënë në banesë ka ndodhur mesditën e së enjtes.
Ka qenë ky shtetas që ka konstatuar zjarrin në banesë dhe ka njoftuar Gjokë Gurrën. Ky i fundit i ka kërkuar kushëririt të ndihmojë në lokalizimin e flakëve, teksa me të birin i është drejtuar fshatit të vendlindjes. Në hyrje të fshatit ka rënë pre e vrasësit, i cili mesa duket ka qenë në pritje të tyre. Kushëriri ka dëgjuar breshërinë e krismave teksa po mundohej të shuante flakët. Ai ka deklaruar para forcave të policisë që nuk ka parë persona të dyshuar në afërsi të banesës. Pasi ka dëgjuar krismat, i shtyrë nga kurioziteti por dhe parandjenja e keqe, ka shkuar në drejtim të zonës nga ku ka dëgjuar krismat. Pasi ka ecur diku 15 minuta në këmbë ka parë fuoristradën e kushëririt dhe trupat e Gjokë e Eduard Gurra brenda në makinë pa shenja jete. Menjëherë kushëriri i viktimave ka marë në telefon policinë, duke e njoftuar për ngjarjen e rëndë.
I pyetur se kush e kishte bërë vrasjen, Gurra, ka rëfyer se nuk ka parë asnjë person të armatosur dhe jo të armatosur rreth zonës së krimit. Njëherësh Gurra, ka rrëfyer se nuk dinte asgjë se në çfarë rrethanash kishte rënë zjarri në shtëpinë e Gjokë Gurrës, por ka deklaruar se kur ka njoftuar kushëririn e tij, viktima Gjokë Gurra ka dyshuar që shkak mund të ishte oaneli diellor që kishte instaluar në çatinë e shtëpisë. Ditën e sotme një grup ekspertësh të policisë zjarrfikëse kanë shkuar në banesën e djegur, për të mësuar dhe nxjerë shkaqet kryesore të rënies së zjarrit në banesë.
Tashmë veç hetimit për kultivimin e drogës në njësinë administrative Pult, mosmarrëveshjeve për shfrytëzimin e lëndëve drusore, policia është përqëndruar në një tjetër pistë hetimore. Mësohet se një vit më parë Gjokë Gurra dikur punonjës i policisë së rendit, sot sipërmarrës në tregtimin e lëndëve drusore, ka patur konflikt me një shtetas po nga fshati Sumë, emri i të cilit nuk bëhet i ditur, për shkaqe hetimi. Kohë më parë, Gjokë Gurra, ka shërbyer dhe si kryeplak i fshatit.
