TIRANË– Ka dështuar për të teten herë ballafaqimi mes të penduarit të drejtësisë Luftar Reçi dhe të pandehurve Viktor Ymeri, Emiljano Shullazi, Indrit Taullai dhe Indrit Rusi, të akuzuar për vrajsen e Klodian Saliut e Vajdin Lames.
Këtë të hënë Reçi nuk u paraqit në seancë duke detyruar Gjykatën që të urdhërojë shoqërimin e detyrueshëm të tij para togave të zeza dhe të akuzuarve. Reçi tha se e ka të pamundur të paraqitet në seancën e sotme, pasi vuan nga diabeti. Po ashtu, ai tregoi se ka qënë i pranishëm në 5 seancat e mëparshme, mirëpo të gjitha dështuan.
“Nuk kam mundësi të paraqitem. Vuaj nga diabeti, më rrezikohet jeta. Jam paraqitur 5 herë, seancat nuk janë bërë, nuk është faji im.“- është shprehur Reçi.
Më tej, Reçi tha se paraqitjen e tij në Gjykatë, e krahason me daljen para ujqërve.
“Të më sjellësh mua ne gjykate është sikur t’u sjellësh qingjin ujqërve. Do flas me videokonferencë”, thotë Reçi.
Nga ana tjetër, Shullazi kërkoi prezencën e Reçit në sallë.
“Dua ta shoh në sy kur dëshmon”
Seanca e radhës u vendos të zhvillohet më 20 Mars, në orën 09:00.
