DETAJE TË REJA/ Atentati me 103 plumba në Milot, si 2 vrasësit zbrazën karikatoret mbi Klisman Preçin dhe Ylli Brahimin, 2 të tjerë i prisnin t’i largonin

Detaje të reja kanë dalë nga atentati i ditës së premte në Milot ku humbi jetën Klisman Preçi dhe mbeti i plagosur Ylli Brahimi.

Burime për mediat bëjnë me dije se gjatë atentatit morën pjesë 4 vrasës me pagesë, ku dy prej tyre ishin në rolin e qitësit, ndërsa dy të tjerët prisnin në makinë.

Autorët pritën të hapej dera e mjetit dhe më pas kanë qëlluar në drejtim të automjetit me të cilin po udhëtonte Klisman Preçi dhe Ylli Brahimi.

103 plumbat e përdorur nuk ishin blindshpues, ndërkohë mësohet se të shtënat pa ndërprerje zgjatën për rreth tre minuta.

27-vjeçari Preçi, i cili u qëllua i pari, ka zbritur nga makina dhe është prekur nga breshëria e plumbave, që i shkaktoi edhe vdekjen.

Ndërsa, Ylli Brahimi ka hapur derën dhe ka tentuar të dalë nga mjeti në të cilin ishte si pasagjer, mirëpo ai ka hyrë sërish në makinë për t’u mbrojtur nga plumbat.

Pista kryesore ku policia po heton është e shkuara e dy shënjestrave të atentatit. Ylli Ibrahimiaj njihet si shok i Ervis Martinajt, i dyshuar si i përfshirë në konflikte me grupe rivale.