TIRANË– Detaje të reja kanë dalë në dritë nga krimi horror i ndodhur 5 vite më parë kur Menduh Kurt-Deda u rrëmbye, dhunua e më pas u dogj i gjallë nga Besmir Karaj dhe Gazmir Ngota me porosi të Marjeta Karajt, e cila kishte dhe një lidhje dashurie me viktimën.
Marjeta, e cila e kishte “maskuar” krimin e kryer duke u marrë me bamirësi ra në rrjetën e Policisë falë përgjimeve. A2CNN’ raporton se zbulimi i ngjarjes ka ardhur për shkak të një përgjimi të Marjeta Karajt, e cila një tjetër personi që i kishte borxh, i ka thënë “të djeg, siç dogja Menduhun”.
Shkak për krimin e rëndë është bërë një borxh prej 10 milion lekësh të vjetra që viktima Menduh Kurt-Deda i kishte Marjeta Karajt. Ai u dogj për së gjalli nga Besmir Karaj në “Kodër Shupal”. Ai u lidh në një pemë me zinxhir e më pas u dogj me benzinë. Krimi u zbardh pas vjetësh. Besmir Karaj ndodhet në arrati ndërsa e ëma Marjeta Karaj dhe bashkëpunëtori i tij Gazmir Ngota janë në burg.
