GREQI– Detaje të reja kanë dalë në dritë nga bastisja e qelive të 13 shqiptarëve në Chania të Kretës, në Greqi. Mediat greke shkruajnë se një nga qelitë e kontrolluara nga njësia speciale është dhe ajo e kreut të mafias shqiptare në Greqi Klodian Lekocaj. Ndërkohë kontrollet e sotme mediat e vendit fqinj i lidhin me vrasjen e dy shqiptarëve Kreshnik Çerçizaj dhe Armando Ogrenja disa ditë më parë në sheshin kryesor të Athinës.
Shqiptari Klodian Lekocaj ka qenë disa herë në shenjester të hetimeve të policisë greke si porositës i vrasjes së kundërshtarëve nga burgu. Kjo ka bërë që hetuesit të shtrijnë hetimet dhe brenda qelive të burgut ku qëndrojnë krerët e mafias shqiptare.
Në qelinë e një shqiptari që ka të deklaruar 12 mbiemra, 15 emra dhe 9 ditëlindje të ndryshme, që variojnë nga 1969 deri 1989, u gjetën dhe sekuestruan 6 ilace zanax, një celular dhe shënime me shkrim dore me numra celularësh. Në një qeli ku ndodheshin dy shqiptarë të tjerë u gjetën dhe sekuestruan 2 thika që ju gjetën njërit prej të burgosurve dhe lima metalike, brisqe metalike, një celular dhe një fill peshkimi. Këta dy të fundit janë 28 dhe 58-vjeç.
