TIRANË– Deputeti i Partisë Demokratike Flamur Noka ka reaguar këtë të shtunë pas dorëheqjes së ish-deputetit socialist Rrahman Rraja nga mandati i ligjvënësit për shkak të përfshirjes së djalit të tij dhe familjarëve të tjerë në një konflikt të dhunshëm që tronditi opinionin publik. Përmes një postimi në rrjetet sociale Noka shkruan se shteti është në duart e të fortëve të zonës, të cilët pretendon se uniformat blu kanë frikë t’i ndalojnë. Ndër të tjera Noka shprehet se me banda të tilla me lidhje me pushtetin nuk mund të presësh që në vend të ketë zgjedhje të lira.
Flamur Noka: Dhuna burracake ndaj dy qytetarëve tregoi se shteti është i dorëzuar kontrollit të të fortëve të zonës. Policia e Shtetit ka frikë të ndalojë dhunuesit. Pret urdhra nga politika, sa të kthehet kryeministri e të shkruajë një nga ato autokritikat me lotë në sy që i mësoi shkolla e partisë. Ngjarja është turp për shtetin, për policinë dhe për partinë qeverisëse që përfaqësohet nga barbarë. Si mund të ketë zgjedhje të lira në Krujë me këta barbarë që dhunojnë qytetarët për të heshtur një komunitet të tërë? Ky pushtet i dhunshëm që kanë sot në duar vjen si rezultat i asaj që ndodhi më 14 maj. Ndjehen zotër mbi tokë. “Kokat le të hanë”, thotë i pari i tufës. Ç’mund të presësh prej tyre, garë të ndershme?! Respektim të të drejtave e vullnetit popullor?! Janë fytyra pa maskë e një pushteti grabitqar që i sheh shqiptarët si pre. Nuk ka zgjidhje pa zgjedhje të lira!
