TIRANË– Një video e publikuar në rrjetet sociale ku shumë shpejt u bë virale, ka zbuluar një skandal të ndodhur midis disa adoleshenteve në kryeqytet. Në video shihen një grup vajzash që dhunojnë me grushta e shqelma një shoqen e tyre, teksa një vajzë tjetër filmon me celular, dhe përdor fjalor banal, duke nxitur më tej dhunë.
Menjëherë Newszone.al vuri në dijeni për rastin Shërbimin Social Shtetëror, po ashtu edhe Agjencinë për Mbrojtjen e Fëmijëve, dhe sipas informacione, blutë e kryeqytetit kanë shoqëruar dhe po intervistojnë 5 të mitur të moshave 13 dhe 14 vjeç (një djalë e 4 vajza), të përfshirë në konflikt.
NJOFTIMI I POLICISË:
Reagim i Drejtorisë Vendore të Policisë Tiranë
Në lidhje me një video të publikuar në portale ditën e sotme, në të cilën shfaqen disa të mitura që dhunojnë një bashkëmoshataren e tyre, ju sqarojmë se:
Shërbimet e Komisariatit të Policisë Nr. 6, menjëherë pas publikimit të pamjeve filmike, organizuan punën për identifikimin e shtetaseve që shfaqen në video si dhe sqarimin e rrethanave të kësaj ngjarjeje.
Pas verifikimive të kryera për identifikimin e tyre, në bashkëpunim edhe me drejtorinë e shkollës, u bë i mundur identifikimi i një të mituri që kishte filmuar konfliktin, si dhe identifikimi i 4 të miturave të përfshira në konflikt.
Në ambientet e Komisariatit të Policisë Nr. 6, në prezencë të prindërve dhe të punonjësve socialë, janë shoqëruar dhe po intervistohen 5 të mitur të moshave 13 dhe 14 vjeç (një djalë e 4 vajza).
Nga verifikimet paraprake të kryera, ka rezultuar se ngjarja ka ndodhur me datë 15.02.2023, në rrugën “3 Dëshmorët”, dhe jo në ambientet e shkollës “Kongresi i Manastirit”.
Vijon puna për sqarimin e rrethanave të konfliktit nëpërmjet shtetaseve të mitura.
Drejtoria Vendore e Policisë Tiranë falënderon mediat dhe qytetarët që denoncojnë rastet e paligjshmërisë dhe i fton sërish ata që të denoncojnë çdo rast paligjshmërie, në numrin 112, duke iu garantuar anonimat të plotë dhe reagim të menjëhershëm e të paanshëm.
