ELBASAN– Drejtoria Vendore e Policisë së Elbasanit ka reaguar në lidhje me dhunën e ushtruar ndaj një 13-vjeçari nga elektriçisti i fshatit Funare në Librazhd Hysenb Balliu. Rasti u bë publik mbrëmjen e djeshme në emisionin investigativ Fiks Fare. Elektriçisti e ka dhunuar për tre vite radhazi të miturin, i cili në një moment depresioni për situatën e kaluar ka tentuar ti japë fund jetes. Po ashtu bëhet me dije se 13-vjeçari u mor në pyetje për rastin, në prani në psikologes, punonjëses sociale, avokatit dhe të familjarëve të tij.Nga veprimet hetimore rezultoi sipas policisë se kjo ngjarje ka ndodhur rreth pesë vite më parë dhe është filmuar nga një person ende i paidentifikuar. Policia e Librazhdit thotë se nuk ka pasur denoncim më parë për rastin e publikuar në Top Channel, ndërsa mbi 59-vjeçarin rëndon vepra penale “Keqtrajtimi i të miturit”.
NJOFTIMI:
Në lidhje me rastin e transmetuar mbrëmjen e djeshme, në emisionin investigativ “Fiks Fare”, gjatë të cilit u shfaq një video me pamje ku një shtetas dhunonte fizikisht një shtetas të mitur, ju bëjmë me dije se:
Menjëherë pas marrjes dijeni për këtë rast, shërbimet e Komisariatit të Policisë Librazhd, në bashkëpunim me strukturat e Drejtorisë Vendore të Policisë Elbasan, nisën veprimet hetimore, nën drejtimin e Prokurorisë pranë Gjykatës së Rrethit Gjyqësor Elbasan.
Në vijim të veprimeve, shtetasi H. B., që shfaqet në video duke dhunuar të miturin, u shoqërua në Komisariatin e Policisë Librazhd. Gjithashtu, shtetasi i mitur u mor në pyetje për rastin, në prani në psikologes, punonjëses sociale, avokatit dhe të familjarëve të tij. Nga veprimet hetimore rezultoi se kjo ngjarje ka ndodhur rreth 5 vjet më parë dhe është filmuar nga një shtetas i paidentifikuar ende. Deri në momentin e transmetimit të videos, në emisionin investigativ, Policia nuk ka patur kallëzime apo informacione për këtë rast. Në vijim të veprimeve, specialistët për Hetimin e Krimeve të Komisariatit të Policisë Librazhd referuan materialet në Prokurori dhe nisi procedimi penal për shtetasin H. B., 59 vjeç, banues në Librazhd, për veprën penale “Keqtrajtimi i të miturit”.
Në bashkëpunim me Prokurorinë vijojnë hetimet për zbardhjen e plotë të rrethanave të këtij rasti, si dhe për identifikimin dhe vënien përpara përgjegjësisë ligjore të shtetasit që ka filmuar videon e transmetuar mbrëmjen e djeshme, pasi ka konsumuar veprën penale “Mosmarrja e masave për të ndërprerë gjendjen e paligjshmërisë”.
Materialet për këtë rast i kaluan Prokurorisë, për veprime të mëtejshme. Policia e Elbasanit fton qytetarët dhe median, që të denoncojnë çdo paligjshmëri, duke iu garantuar reagim ligjor, të menjëhershëm dhe të paanshëm.
