TIRANË– Përfaqësues të Ambasadës së Kenias në Romë kanë ardhur ditën ne sotme në Shqipëri dhe janë paraqitur në komisariatin nr. 1 për të marrë informacion në lidhje me hetimet për dhunimin e 22-vjeçares e njohur me emrin Joy. Raportohet se përfaqësuesit janë takuar me shefin e komisariatit për të mësuar detaje dhe nëse janë mbrojtur pozitat e shtetases së tyre.
Joy kishte ardhur në Tiranë për të punuar në një kazino. Ajo u dhunua barbarisht brenda apartamentit të saj dhe më pas u hodh nga kati i dytë ku dhe do të pikasej të nesërmen nga banorët e mbuluar në gjak. Pas hetimeve të kryera që prej gushtit, Prokuroria e Tiranës e cila e ka regjistruar çështjen për veprën penale të plagosjes së rëndë me dashje e ka rikthyer hetimin sërish në polici ku i janë lënë detyra të veçanta oficerëve të komisariatit nr. 1 në kryeqytet. E para që u ripyet ishte shoqja e dhomës se 22-vjeçares e cila është nga Gana. Po ashtu janë pyetur edhe stafi i kazinosë dhe shoferi që e transportoi 22-vjeçaren në rezidencë pak orë para se të gjendej nga banorët jashtë rezidencës në gjendje të rëndë.
Kjo ngjarje e rëndë është ende pa një autor të dyshuar dhe në pranga. Sipas ekspertizës mjeko-ligjoire të kryer thuhet se dëmtimet më të mëdha në trupin e 22-vjeçares janë shkaktuar nga rënia nga kati i dytë. Kjo bën që policia të ketë dyshime të forta se ajo është shtyrë nga dikush, se kush mbetet ende një mister për policinë dhe drejtësinë shqiptare. Për të bërë të mundur shërimin e saj ajo duhet dërguar jashtë Shqipërisë dhe ti nënshtrohet një operacioni që kushton më shumë se 100 mijë euro., para të cilat familja e vajzës nuk i ka. Deri më tani është hapur një llogari por shuma që është është mbledhur është ende larg asaj që duhet.
