Dhuna ndaj grave dhe vajzave mbetet shqetësim kryesor në Shqipëri. Elbasani, Gramshi, Tirana dhe Vora janë qytetet që janë tronditur ditët e fundit nga vrasjet dhe plagosjet e grave, kryesisht nga bashkëshortët e tyre por edhe të afërm të tyre të cilët u kanë marrë jetën. Lidhur me fenomenin që po trondit pothuajse çdo ditë shoqërinë tonë nuk kanë munguar reagimet e shoqatave por ajo që vihet re janë qëndrimet e ftohta të pushtetit gjyqsor. Aktivistja Sevim Arbana ka reaguar nëpërmjet një postimi lidhur me fenomenin, duke bërë thirrje për dënim maksimal me një seance gjyqësore për çdo vrasës grash.
“Vrasjet e grave në shoqërinë tonë po shtohen në mënyrë të frikshme vetëm ditët e fundit Dhe pas divorcit, dhunuesi e ndjek dhe e vret.
As jeta në një vend ku ligji dhe mentaliteti e mbrojnë fort gruan, s i ndal këta bisha që s e meritojnë jetën as emrin : njeri Ndaj njerëz, mos diskutoni dhe paragjykoni gratë, viktima të dhunës, paranojën e tyre të friksimit. Zero tolerancë ndaj çdo dhunuesi! Dënim maksimal me një seancë gjyqi, për çdo vrasës grash!”- shkruan Arbana.
Vetëm një javë më parë në Kusarth të Elbasanit, një 44-vjeçare gjeti vdekjen nga kunati i saj. Alma Qevani u godit me sëpatë nga kunati i saj Tefik Tashi, 58 vjeç.
Policia tha se fillimisht ka pasur një debat mes autorit të ngjarjes dhe kunatës së tij, motrës së gruas, që më pas degradoi deri në vrasje. 58-vjeçari ka qenë në gjendje të dehur në momentin e krimit ndërsa pas arrestimit u tha hetuesve se Alma e kishte sharë dhe kjo ishte arsyeja që e kishte nxehur dhe e kishte goditur.
Një tjetër krim i dyfisht në Paskuqan tronditi opinionin publik në mars të këtij viti, ku vrasësi Dan Hutra i mori jetën 2 grave të tjera pas ish gruas së parë që po ashtu e kishte vrarë. Në gjykatë ai ka mbajtur të njëjta qëndrime si në polici. Para togave të zeza nuk ka shprehur pendesë për krimin.
Më herët, vrasja e një nëne të re në Roskovec të Fierit nxiti veprimtaret e shoqërisë civile të kërkojnë shtimin e masave nga institucionet për të frenuar dhunën në familje. Shoqëria dhe institucionet bëhen të ndjeshme kur vritet viktima e radhës, por vrasjet ndodhin pas disa denoncimeve të mëparshme për dhunë, të cilat janë lënë mënjanë, pohojnë veprimtaret e shoqërisë civile. Dhuna ndaj grave dhe vajzave në familje është përkeqësuar, ndërsa 5 vitet e fundit numri i denoncimeve prej tyre është rritur mbi 20 për qind. Një pjesë e këtyre shifrave tregojnë dhunën e fshehur e të mbartur në vite brenda familjeve shqiptare, që bëhet e dukshme vetëm nga vrasjet e grave dhe vajzave.
Vetëm për vitin 2022, mbi 3000 gra dhe vajza kanë kërkuar ndihmë, pasi ishin të dhunuara, jo vetëm nga bashkëshorti, por dhe familjarë të tjerë.
Nga ana tjetër duket se kjo nuk ka vënë aspak në lëvizje gjykatat të cilat shpesh bëhen shkak, me vendimet e tyre, të një tjetër vrasje edhe pse është kërkuar ndihmë apo urdhër mbrojte duke e rrëzuar dhe duke lënë të hapur kështu një tjetër ‘varr’./Newszone
