MALI I ZI– Dy efektivët e policisë kufitare, të cilët disa muaj më parë dhunuan kryetarin të Komisionit të Ekonomisë në Partinë e Lirisë, i cili më parë ka mbajtur dhe detyrën e këshilltarit të Ilir Metës gjatë kohës që ky i fundit ishte president i vendit janë shkarkuar këtë të mërkurë nga detyra dhe janë vënë në pranga.
Sipas mediave vendase, në pranga janë vendosur efektivët Nikola Boljevic dhe Dragan Scekic. Petraq Milo dhe familja e tij janë dhunuar nga Policia malazeze në doganën e Muriqanit. Pamjet e dhunës tregonin momentin kur ish-këshilltari i ish-presidentit Ilir Meta është nxjerrë zvarrë nga makina dhe më pas është përplasur pas një tjetre. Ngjarja ndodhi më 15 janar në pikën kufitare Sukobinë-Muriqan, afër Ulqinit. Por vetëm një muaj më pas, në rrjete sociale është publikuar videoja ku shihen efektivët e policisë që dhunojnë Petraq Milon.
