Kohët e fundit është bërë funksional “Burgu i natës” si shlyerje e dënimit në mënyrë alternative. Përmes një shkrese ditë më parë Drejtoria e Përgjithshme e Burgjeve njoftoi të gjitha gjykatat në vend, prokurorin e përgjithshëm dhe kryeprokurorin e SPAK, se është bërë funksional burgu i hapur në Tiranë.
Shkresa mban datën 30 gusht dhe iu shpërnda 23 institucioneve të drejtësisë, përfshi të gjitha gjykatat e të dyja shkallëve, KLGJ dhe KLP si edhe shefes së ekzekutimeve të vendimeve penale për t’u treguar adresën e burgut të hapur. Burgu i hapur gjendet në ish-burgun e grave në zonën e “Ali Demit”.
Kategoria e të burgosurve që mund të fitojë burgosjen gjatë natës dhe ditën të jetë i lirë janë shtetasit që u ka mbetur më pak se 6 muaj dënim për vepra të lehta dhe me kushtin që komisioni penitenciar ta vlerësojë të parrezikshëm, si edhe kushdo që gjatë gjykimit është dënuar me gjysmë liri. Kjo s’do të thotë se burgu nuk ka gardianë.
Kurse dje Ministria e Drejtësisë dhe Drejtoria e Përgjithshme e Burgjeve, me mbështetjen e Ambasadës Britanike, njoftuan se po finalizon përgatitjet për popullimin e burgut të hapur “Ali Demi”. Ky investim i qeverisë shqiptare synon përmirësimin e sistemit penitenciar përmes rehabilitimit dhe riintegrimit më të shpejtë të të burgosurve që po përgatiten për t’u rikthyer në jetën qytetare. Me ndihmën e ambasadës britanike, është siguruar mbështetje për përmirësimin e infrastrukturës dhe trajnimin e burimeve njerëzore për menaxhimin e këtij institucioni të ri i kësaj natyre.
Drejtori i Përgjithshëm i Burgjeve, z. Klevis Qose, mori pjesë në ditën e parë të trajnimit, ku të pranishëm ishin edhe z. Duncan Nutt, ekspert i burgjeve dhe përfaqësues i shtetit britanik, dhe Adam Connolley, Drejtor i Burgut të Hapur HMP Haverigg në Angli. Z. Qose falënderoi ambasadën britanike për kontributin e tyre të vazhdueshëm në përmirësimin e infrastrukturës së burgjeve shqiptare dhe në përgatitjen e stafit përmes trajnimeve dhe vizitave studimore në burgjet britanike.
“Sot jemi dëshmitarë të një momenti të veçantë për sistemin tonë penitenciar, me trajnimin për menaxhimin e burgut të hapur,” tha ai.
“Hapja e këtij burgu është fryt i bashkëpunimit tonë me Britaninë dhe na lejon të adoptojmë standardet e tyre të avancuara. Falënderoj ekipin britanik për mbështetjen e tyre dhe për kontributin që po japin në trajnimin e skuadrës sonë.”.
Adam Connolley falënderoi palën shqiptare për ftesën dhe theksoi rëndësinë e bashkëpunimit dypalësh.
“Ne, gjithashtu, mësojmë nga përvojat tuaja. Sistemi i burgjeve të hapura ofron mundësi të mëdha për rehabilitimin dhe përgatitjen e të burgosurve për lirinë e plotë, dhe ne jemi të lumtur të ndajmë përvojat tona në këtë fushë.”.
Z. Duncan Nutt, në fjalën e tij, theksoi se mbështetja britanike do të vazhdojë për t’i ndihmuar autoritetet shqiptare në hapjen dhe menaxhimin sa më të suksesshëm të këtij burgu, duke nënvizuar se burgjet e hapura janë një element kyç në riintegrimin e të burgosurve.
