Djali i biznesmenit të njohur të ujit Lajthiza, Edison Elezaj 32 vjeç është shpallur në kërkim nga policia e Tiranës, pasi në një festë pas mesnate në një restorant vipash, ka qëlluar me armën që mbante pa leje, dukë lënë të plagosur 3 të rinj, anëtarë të një familje. Fillimisht policia thotë se shkrepja e armës ishte aksidentale, por më tej njoftoi se 32-vjeçari akuzohet për plagosje të rëndë me dashje. 2 miq të rij që fshehën armën pas ngjarjes, u arrestuan
TIRANË- Një festë e orëve të vona në një nga restorantet më luksoze në rrugën e Kavajës, brenda kompleksit të banimit “Deligjorgji” në Tiranë, përfundoi me 3 të plagosur me armë zjarri, anëtarë të së njëjtës familje, motra dhe vëllezërit.
Në mesin e të ftuarve VIP në festën e një rrethi shoqëror e familjar, djali i biznesmenit Hajri Elezaj, i njohur si pronar i ujit “Lajthiza”, Edison Elezaj 32 vjeç mbante me vetë një armë pa leje, të cilën e shkrepi pas mesnate duke lënë të plagosur 3 familjarët, një vajzë 36 vjeç binjake me vëllain dhe më i vogli mes tyre, 34 vjeç, të cilët u paraqitën rreth orës 01:35 në një spital privat në Tiranë me dëmtime. Vëllezërit kanë lënë spitalin pasi kanë marrë mjekim, ndërsa vajza 36-vjecare – thotë policia – është ende nën kujdesin e mjekëve, por jashtë rrezikut për jetën.
“Rreth orës 01:30 të mëngjesit të sotëm, ata kanë qenë duke festuar së bashku me persona të tjerë nga rrethi i tyre shoqëror dhe familjar, në një lokal në Rrugën e Kavajës”, thotë policia.
