TIRANË– Detaje të reja kanë në dritë pas arrestimit të Albano Velos, babai i të cilit ishte efektiv i Policisë së Shtetit. Mësohet se Dilaver Velo rezulton të jetë kallëzuar nga Partia Demokratike për shpërdorim detyre. Ai është në listën e efektivëve të kallëzuar nga selia blu për shpërdorim detyre në kallëzimin për zgjedhjet e 25 prillit. Ky kallëzim është bërë më 7 prill të 2021. Velo ndërkohë është pezulluar nga radhët e uniformave blu me urdhër të Drejtorit të Përgjithshëm të Policisë Muhamet Rrumbullaku pas arrestimit të djalit të tij si ekzekutor dhe planifikues i vrasjes së biznesmetit Edmond Papa në zonën e Selitës.
Në kallëzimin e depozituar, PD ka akuzuar Velon për konsumim të veprave penale të “Korrupsionit aktiv në zgjedhje” parashikuar nga neni 328, “Korrupsionit pasiv në zgjedhje” parashikuar nga neni 328/b, “Kanosjes apo dhunimit ndaj pjesëmarrësve në zgjedhje” parashikuar nga neni 329 dhe “Marrjes ose përdorimit të paligjshëm të dokumenteve të identifikimit” parashikuar nga neni 331/a të Kodit Penal.
“Shtetasit e mësipërm kanë shkelur Kodin Penal dhe Kodin Zgjedhor nëpërmjet: Intimidimit me anë të punonjësve të administratës shtetërore të anëtarëve të Partisë Demokratike të zhvillojnë aktivitetet e parashikuara prej tyre në Njësitë Administrative 4 dhe 8, duke i kërcënuar këta të fundit me sanksione administrative/penale. Vizitave dhe intimidimit me anë të punonjësve të administratës shtetërore të pronarëve të bar/kafeve ku Partia Demokratike ka zhvilluar takime, duke i kërcënuar që në rast se lejojnë mbledhje në të ardhmen do të gjobiten nga organet e tatimeve dhe policisë. Kërcënimi me anë të telefonit apo personalisht nëpërmjet punonjësve të administratës shtetërore të aktivistëve të Partisë Demokratike dhe aleatëve të opozitës me qëllim që të largohen nga veprimtaria në këtë parti dhe të mos ushtrojnë të qetë të drejtat e tyre ligjore dhe në rast mostërheqje do të përballen jo vetëm me dënime atyre dhe familjarëve të tyre, por dhe me dhunë fizike.”, thuhet në kallëzimin e PD.
