ELBASAN– Detaje të reja janë zbardhur nga kërcënimi i biznesmenit në Elbasan. Raportohet se bëhet fjalë për Eral Myftaraj. Ky i fundit dhe familjarët e tij janë kërcënuar me jetë nga Algert Alcani, 27 vjeç, Edmir Boci, 37 vjeç, Shaqir Alcani, 62 vjeç si dhe 38-vjeçari i identifikuar me inicialet L.K. Të katërt i kanë kërkuar Myftarajt që të tërhiqet nga tenderi 1 milionë euro i fituar në bashkinë e Tiranës.
Por biznesmeni nuk ka pranuar që të tërhiqet nga tenderi për furnmizimin me lëndë drusore. Kështu të katërt kanë kërcënuar me jetë atë dhe familjen e tij. Të arrestuarit dhe i shpalluri në kërkim i kanë thënë biznesmenit se nëse nuk bindet ata do i vrisnin anëtarët e familjes.
I gjendur përballë kërcënimeve të vazhdueshme dhe shantazhit me jetën e familjarëve të tij Eral Myftaraj ka bërë denoncimin në polici. Pas marrjes së denoncimit policia e Elbasanit ka nisur hetimet dhe pas një muaji u bë i mundur arrestimi i tre personave ndërsa po punohet për kapjen e 38-vjeçarit të shpallur në kërkim.
