TIRANË– Kryeministri Edi Rama ka shpallur ditën e dielë, ditë zie kombëtare në nder të viktimave që shkaktoi aksidenti hekurudhor në Greqi, ku deri më tani janë shënuar 57 viktima dhe dhjetra të zhdukur. Lajmin e ka bërë të ditur vetë kreu i qeverisë në një postim në rrjetet sociale. Deri më tani nga aksidenti më i rëndë hekurudhor në Greqi kanë humbur jetën 57 persona, mes të cilëve ka edhe shqiptarë që jetojnë në Greqi.
POSTIMI I RAMËS:
Tragjedia e Greqisë është edhe tragjedia jonë, dhimbja për jetët e humbura në aksidentin e tmerrshëm është edhe jona dhe ky është një nga ato momente jetësore, kur një humbje e madhe tek fqinji të tregon më shumë se sa njëqind gëzime që jetët tona janë të ndërlidhura pazgjidhshmërisht, e se duhet të bëjmë çmos që t’i bëjmë ato sa më të mira, duke bashkëpunuar gjithnjë e më shumë me njëri-tjetrin. Ditën e dielë Shqipëria do të nderojë me një ditë zie viktimat e tragjedisë, duke u bashkuar simbolikisht me Greqinë mike me flamurin kombëtar të ulur në gjysëm shtize.
