TIRANË– Ish-drejtuesi i lartë i policisë Erzen Breçani ka treguar detaje të reja në lidhje me incidentin e rëndë të regjistruar ditën e djeshme ku Gerti Shehu qëlloi me grusht në fytyrë kreun e PD Sali Berisha!
I ftuar në emisionin “Now” Breçani tha se vetë Sali Berisha dhe kreu i PL-së Ilir Meta kanë kërkuar që agresori të mos dhunohej. Breçani tregoi se pasi kishte ndërhyrë për ta nxjerrë agresorin në trotuar në mënyrë që ta largonte nga turma e irrituar, vetë truproja e Berishës i kishte përcjellë porosinë e këtij të fundit që 31-vjeçari të dorëzohej në polici.
“Sali Berisha, pasi e kemi nxjerrë në trotuar nga turma, ka ardhur truproja i tij dhe ka thënë që doktori ka porositur që duhet ta dorëzojmë në polici dhe të mos preket më me dorë. Kam qenë duke ecur dhe duke biseduar me të në trotuar. U jam mirënjohës që mu bindën”, tha Breçani.
