Borussia Dortmund është përpjekur muajt e fundit të rinovojë me Jude Bellingham, por nuk ka pasur sukses në asnjë prej tentativave. Mesfushori anglez nuk është i gatshëm të zgjasë qëndrimin në Gjermani dhe pozicioni i tij nuk ka ndryshuar.
Në fakt, Bellingham ka qenë shumë i drejtpërdrejtë me klubin e tij aktual dhe ofertave të tij për rinovim iu përgjigj me: “Po shkoj në Madrid”. Nënshkrimi po merr formë dhe objektivi i “Los Blancos” është ta zyrtarizojë afrimin e lojtarit pas finales së UEFA Champions League në Stamboll.
Real Madridi është në kontakt me enturazhin e tij që nga janari dhe klubi gjerman është i vetëdijshëm për të gjitha këto manovra. Borussia Dortmund e di se rekordmenët spanjollë nuk kanë bërë asgjë jashtë rregullave dhe janë të vetëdijshëm se nuk mund të bëjnë më shumë në këtë situatë.
Miqësia e madhe që ruajnë të dy klubet mund të jetë një nga faktorët kyç për të mbyllur sa më shpejt mbërritjen e Jude në Chamartín. Manchester City është skuadra e vetme që është në garë, ndonëse është Real Madridi që e nis si favorit këtë herë.
