Kërkesa e Prokurorisë së Posaçme Kundër Korrupsionit dhe Krimit të Organizuar për arrestimin e ish- ministrit të Financave dhe ish-zëvendëskryeminsitrit Arben Ahmetaj ka marrë gjithë vëmendjen e publikut por dhe ka rikthyer dhe njëherë vëmendjen tek arrestimi i ish-ministrit të Mjedisit Lefter Koka. Dosja voluminoze e inceneratorëve ka bërë që para drejtësisë të shkojnë një numër i lartë zyrtarësh e ish-zyrtarësh mes të cilëve Lefter Koka dhe ish-Sekretari i tij i Përgjithshëm në Ministrinë e Mjedist Alqi Bllako.
Koka nuk i ka pranuar kurrë akuzat e ngritura ndaj tij, atë të “shpërdorimit të detyrës” , “korrupsion pasiv” dhe “pastrim i produkteve të veprës penale”. duke pohuar se nuk ka përfituar asgjë nga kontratat e incenerimit dhe për firmat e hedhura gjatë kohës që drejtonte ministrinë. Kjo nuk i ka bindur hetuesit e SPAK të cilët e ka lënë në burg. Lefter Koka ka deklaruar që në fillim të hetimeve se Prokuroria e Posaçme nuk ka asnjë provë kundër tij. Kulmi arriti në seancën e shkuar ku Koka akuzoi SPAK se se po organizon njjë proces të stisur ndaj tij, ndërsa shtoi se ai nuk i njeh pronarët e inceneratorëve.
Lefter Koka: Një e vërtetë e thënë përgjysmë është e pavërtetë. Prokuroria u bazua tek kallëzimi LSI dhe për 2 vite nuk më mori në pyetje asnjëherë. Unë si ministër, Sekretari përgjithshëm dhe Komisioni kemi zbatuar me përpikmëri ligjin. Bëmë punën më të mirë dhe shërbyem me devotshmëri. Është kohë e vështirë që kërkon burra e burrni, unë si kam borxh askujt ta paguaj me lirinë time. Akuza e prokurorisë është idiote. Kam hyrë në politikë si biznesmen dhe s`më bëri politika biznesmen. Po kthehemi 45 vite para në proceset e stisura të sistemit komunist. Është një alarm jo vetëm për mua por për të gjithë shoqërinë. Ky proces është i manipuluar fund e krye, besoj se e vërteta do të triumfojë. Nuk ekziston asnjë kontakt ose njohje me pronarët e inceneratorëve, ato nuk i solla unë por erdhën si propozim nga bota e biznesit. Prokurori devijoi hetimet dhe fraksionojë dosjen për të mos zbuluar të vërtetën. Drejtësia më herët sesa vonë do të dalë. Intriga e këtij procesi dashakeqës do të dalë dhe uroj të shërbejë për konsolidimin e mëtejshëm të reformës në drejtësi. Prokurori fshehu 40 fashikuj hetimor ku gjenden provat për pafajësinë time. Më janë vënë në dispozicion nga gjykata 1 javë më parë. Akuza pësoi mutacione për t’i qëndruar besnike kallëzimit të LSI. Kurrë nuk i kam futur dorën në xhep dikujt. Kjo është një situatë e stisur nga presidenti me fallxhoren e tij, i cili duke ndenjur mejhaneve thoshte do ta fus në burg.
Pretendimet e Lefter Kokës se nuk i njeh pronarët e inceneratorëve në fakt vertetohet dhe në dosjen që SPAK ka në dorë kundër ish-ministrit. Në dosjen me mijëra faqe nuk ka asnjë telefonatë apo mesazh të shkëmbyer mes Lefter Kokës, Klodian Zotos apo Mirel Mërtirit. Përpos arsyeve ligjore Koka ka kërkuar disa herë nga Gjykata e Posaçme dhënien e një mase më të butë sigurie për shkak të probleme shëndetësore, kërkesa të hedhura poshtë.
Ndërkohë që kërkesa për arrestimin e Arben Ahmetajt rihapi dhe njëherë dosjen e inceneratorëve, disa ditë më parë avokati i Kokës Julian Mërtiri deklaroi se klientoi i tij nuk ka pasur as lidhje,dhe as njohje me Klodian Zoton, tashmë të shpallur në kërkim. Sipas tij ka qenë Arben Ahmetaj ai që ka pasur njohje dhe kontakte me pronarët e inceneratorit të Elbasanit.
Mërtiri deklaroi se Koka ka zbatuar vendimin e Këshillit të Ministrave. Dhe se ka qenë komisioni që është ngritur me përfaqësues të shumë ministrive dhe pushtetit lokal, që ka vendosur për dhënien e koncesionit, ndërsa Koka ka firmosur thjesht vendimin e qeverisë. Ndër të tjera ai kërkoi lirimin e Kokës për shkak të moshës, për arsye se ka probleme të shëndetit, është baba i 3 fëmijëve dhe mbahet prej shumë kohësh në paraburgim. Në fotot e dala nga GJKKO Koka shihej i “tranformuar ” në fytyrë për shkak të problemeve shëndetësore.
Mbetet për tu parë tashmë se kush do të jetë hapi i radhës i SPAK dhe si do të veprojë ky i fundit. Është fakt tashmë se nuk ka asnjë telefonatë mesazh apo takim të vërtetuar dhe faktuar mes Lefter Kokës dhe Klodian Zotos, ndërkohë nga ana tjetër kemi mijëra mesazhe, takime e telefonata mes Arben Ahmetajt dhe Klodian Zotos dhe Mirel Mërtitit. Ndërkohë që njëri është në burg tjetri me siguri sipas dhe informacionve të siguruara nga gazetarët ka ikur jashtë vendit. A po vepron SPAK me dy standarte?/Newszone
