Drejtuesi i medias britanike “BBC”, dha dorëheqjen të premten pasi u zbulua se kishte shkelur standardet etike lidhur me skandalin e huasë ndaj Boris Johnson.
Richard Sharp njoftoi dorëheqjen e tij pasi një hetim e gjeti atë në shkelje të një kodi qeverisës për emërimet publike. Raporti do të publikohet edhe të premten.
Megjithatë, ai tha se raporti mbi kredinë e diskutueshme vërtetoi se ai nuk luajti asnjë rol në “lehtësimin, rregullimin ose financimin e një kredie për ish-kryeministrin”.
Një komitet ligjvënësish në Mbretërinë e Bashkuar zbuloi se Sharp kishte bërë “gabime të rëndësishme gjykimi” duke mos zbuluar se ai kishte vepruar si ndërmjetës për të ndihmuar Johnson të siguronte një hua prej 800 mijë paund.
Sharp u emërua për të drejtuar BBC në vitin 2021, menjëherë pasi u aranzhua huazimi.
“Unë mendoj se kjo çështje mund të jetë një shpërqendrim nga puna e mirë e Korporatës nëse do të qëndroja në post deri në fund të mandatit tim”, tha Sharp, duke iu referuar BBC-së (British Broadcasting Corporation).
Ai pranoi të qëndrojë në detyrën e tij deri në fund të qershorit, për t’i dhënë kohë qeverisë për të caktuar një pasardhës.
Mbikëqyrësi britanik i emërimeve publike, Komisioneri i Emërimeve Publike, ka hetuar përzgjedhjen e Sharp për të kryesuar BBC-në.
Një raport mbi hetimin zbuloi se kryetari nuk arriti të zbulonte një konflikt të mundshëm interesi gjatë emërimit, që ishte roli i tij në lehtësimin e huasë së Johnson.
Megjithatë, raporti vërtetoi se shkelja e lartpërmendur nuk e anuloi emërimin e tij.
Raporti, i përgatitur nga avokati i lartë Adam Heppinstall, u publikua të premten.
