TIRANË– Pas drekës përbashkuese të iniciuar nga deputeti Xhelal Mziu, lideri demokrat Sali Berisha beson se PD-ja, pavarësisht mendimit ndryshe, është më e bashkuar se kurrë. Në një prononcim ekskluziv për “Panorama TV”, kreu demokrat deklaroi se PD-ja tashmë e unifikuar si asnjëherë më parë. “Partia Demokratike është më e bashkuar se kurrë sot. Dhe natyrisht, brenda Partisë Demokratike ka mendime të ndryshme, por në të vërtetë, kjo është parti e mendimit ndryshe”, deklaroi z.Berisha. Lideri demokrat, Sali Berisha, shprehu bindjen se shumica socialiste i gëzohet shpopullimit, pasi në llogaritë e tyre shqiptarët që largohen janë votat kundër tyre.
“Për këtë qeveri, largimi i të rinjve është një lajm i mirë, sepse dobësohet fuqia protestuese dhe votat kundër saj. Për vendin dhe kombin, kjo është absolutisht një katastrofë. Dy gjëra rrënojnë më shumë se tjetër të ardhmen: mungesa e rinisë. E dyta, borxhi. Edhe borxhi është një barrë e tmerrshme. Kjo qeveri, të dyja po i kryen në mënyrën më pasiononte”, theksoi Berisha. Në një takim të organizuar nga Departamenti i Ekselencës dhe Brain&Gain në PD, ku morën pjesë fizikisht, por dhe nëpërmjet “Zoom”-it dhe të rinj që studiojnë jashtë vendit, kryetari i demokratëve premtoi se për t’i mbajtur ata brenda vendit do të përdoren politika stimuluese. Disa prej tyre sipas tij dhanë suksese gjatë qeverisjes 2005-2013.
“Ne do mbështesim shumë përpjekjet tuaja dhe nesër në pushtet ajo do materializohet me sukses të plotë. Sepse investimi në elitën e kombit është investimi më cilësor dhe më i rëndësishëm për të ardhmen e tij”, u shpreh kreu i PD-së. Berisha e akuzoi pasardhësin e tij, Kryeministrin Rama si kundërshtarin më të ashpër të votës së emigrantëve. Berisha premtoi se PD do të shtyjë përpara që e drejta e tyre për të votuar të bëhet realitet, duke kërkuar që dhe vetë ky komunitet të vazhdojë përpjekjet e tij.
“Ka një shkak kryesor pse nuk votojnë, sepse Edi Rama nuk do që të votojnë. Në vitin 2013 unë i dërgova ligjin dhe ai e refuzoi, duke thënë se nuk marr pjesë në zgjedhje nëse voton emigracioni dhe diaspora. Tani është koha që të bashkojmë të gjithë forcat që emigracioni dhe diaspora të votojnë. Ne po diskutojmë se si të bëjmë Shqipëria të përfitojë nga ekselencat e saj kudo që janë. Por kjo i shëmbëllen asaj përpjekje që si të afrojmë njerëz që janë shqiptarë, por jo shqiptarë. Se nuk lejohen të votojnë”, theksoi Berisha.
Ai kërkon që të bashkëpunohet me kandidatët demokratët të dalë nga primaret duke iu dërguar atyre çdo ide dhe alternativë që vlen për ta bërë pjesë të programit të tyre elektoral. Ish-Kryeministri Sali Berisha në takimin me demokratët foli në lidhje me shpalljen non grata nga Britania e Madhe. Ai u shpreh se ka në dorë dosjen që tregon korrupsionin e qeverisë për të arritur këtë vendim ndërsa shtoi se ai është marrë pa asnjë bazë. Berisha deklaroi se është jetike ndërhyrja e çdo qytetari në vend për të shpëtuar Shqipërinë, që të dalë nga kjo situatë.
“Kam dosjen si një qeveri korrupton një ambasador të një vendi të mrekullueshëm. Me mashtrime në çdo faqe që ka shkruar. E njëjta gjë është se si korrupsioni i kësaj qeverie me korrupsionin e Soros, korruptojnë një ambasadore për të marrë një vendim pa asnjë fakt, pa asnjë provë, pa asnjë bazë. Me qëllimin e vetëm për të dëmtuar opozitën dhe për të ndihmuar qeverinë më të korruptuar për shkak të aftësive korruptive të kësaj qeverie. Kjo do të thotë që kjo është dëshmon se sa agresive është kjo qeveri dhe sa korruptive është kjo qeveri. Arrin të krijojë ombrellë me korrupsion ndërkombëtar. Kjo dëshmon se në çfarë situate është ky vend. Sa jetike është ndërhyrja e çdo shqiptari për të shpëtuar këtë vend. Jam i bindur se kjo do të ndodhë. Shqipëria do të dalë një vend me ligjin dhe moralin e qytetarëve të saj”, tha Berisha./Panorama
