Tiranë- Sensibilizimi i të rinjve për të qëndruar larg përdorimit të lëndëve narkotike, të cilat për fat të keq janë përhapur gjerësisht në mosha të ndryshme , ka qënë motivi kryesor i organizimit të eventit “Sëbashku mundemi” të dielën ku morën pjesë mjaft të rinj. Drejtoresha e Kujdesit Shendetesor dhe Shërbimeve të Integruara, Bashkia Tiranë, Matilda Zizolli tha për News Zone se interesi ishte i lartë dhe se u përcollën mjaft mesazhe nga ish përdorues për parandalimin e përdorimit të lëndëve narkotike dhe angazhimi i të rinjve në aktivitete sportive, për një shoqërie të shëndetshme. “Më mirë ta parandalosh sesa ta pësosh”.
Matilda Zizolli:
“Qëllimi i këtij aktiviteti ishte prezantimi i Koalicionit kundër drogës dhe alkoolit dhe sensibilizimi i të rinjve për rrezikshmërinë që vjen nga përdorimi i lëndëve narkotike. Siç ishte dhe slogani i aktivitetit “Sëbashku mundemi” po të bashkojmë forcat vërtet ne mund të bëjmë gjëra të mira për shoqërinë”.
Sipas Zozollit, pikënisja e këtij organizimi ishte Marrëveshja e Bashkëpunimit të Bashkisë Tiranë në kuadër të bashkëpunimit të Organizatës YWCA of Albania me CADCA
“Pikënisja e këtij organizimi ishte Marrëveshja e Bashkëpunimit të Bashkisë Tiranë në kuadër të bashkëpunimit të Organizatës YWCA of Albania me CADCA për krijimin e Koalicionit kundër Drogës dhe Alkoolit qëllimi i të cilit është angazhimi i strukturave të komunitetit për parandalimin e varësisë ndaj drogës dhe alkoolit. Koalicioni kundër drogës dhe alkoolit Tiranë, ka si qëllim angazhimin e sa më shumë përfaqësuesve të komunitetit me qëllim parandalimin e abuzimit të drogës dhe alkoolit, nëpërmjet:
dëgjimit të nevojave të tyre dhe identifikimit të vështirësive;
promovimit të rolit të tyre në krijimin e një shoqërie të shëndetshme;
ofrimit të shërbimeve nga profesionistë të fushave të ndryshme;
komunikimit të mesazheve në mënyra kreative;
trajnimit të aftësive ndërpersonale dhe zgjidhjes së konflikteve;
rritjes së ndjenjës së përkatësisë në grup”.
Drejtoresha e Kujdesit Shendetesor dhe Shërbimeve të Integruara, Bashkia Tiranë, tha se shifrat në rritje të përdoruesve të lëndëve narkotike të vënë përpara përgjegjësisë për të krijuar mundësira për parandalimin.
“Nisur nga të dhënat që raportohen për rritjen alarmante të përdorimit të drogave tek moshat e reja, të gjithë ne vihemi përpara një përgjegjësie të madhe. Mesazhet që u përcollën nga përfaqësues të organizatave të shoqërisë civile dhe disa eksperienca real nga ish përdorues ishin për parandalimin e përdorimit të lëndëve narkotike dhe angazhimi i të rinjve në
aktivitete sportive, për një shoqërie të shëndetshme. “Më mirë ta parandalosh sesa ta pësosh”.
Të rinjtë shfaqën interes dhe e mirëpritën këtë iniciativë duke pohuar se është shumë e vlefshme për ta, pasi në shoqërinë e tyre ka nevojë të flitet për drogat për mos t’u bërë pre e lëndëve narkotike. Të rinjtë kanë filluar ta shikojnë si trend për t’u bërë pjesë e shoqërisë, pa e kuptuar që po shkatërrojnë të ardhmen e tyre”.
Ndërsa pyetjes se a do të vazhdojë ndërgjegjësimi nëpërmjet eventeve të tilla, Zizolli u përgjigj:
“Ky ishte aktiviteti i parë, por jo i fundit. Ne do të vazhdojmë me aktivitete të tjera në shkolla, komunitet dhe aty ku ka nevojë të flitet për drogat. Gjithashtu, doja t’ju informoja se ne jemi dhe në rrjetet sociale në Instagram CAD Albania. Bashkohu edhe ti me koalicionin tonë!”. News Zone
