KOSOVË– Gjykata Themelore e Prizrenit ka caktuar masën e arrestit me burg për një afat prej 30 ditësh ndaj autorit të dyshuar të ekzekutimit të 31-vjeçarit me origjinë nga Kukësi Visar Cengu dhe plagosjen e mikut të tij Rufgen Shehu. Në njoftimin e shpërndarë për mediat Gjykata bën me dije se Dibran Hoxha ose siç njihej me emrin “Kobra” do të përballet me drejtësinë i akuzuar për tre vepra penale, konkretisht: “Vrasje e rëndë”, “Mbajtje në pronësi, kontroll ose posedim të paautorizuar të armëve” dhe “Manipulim me prova”.
NJOFTIMI I GJYKATËS:
D. H., për shkak të dyshimit të bazuar se ka kryer veprat penale: vrasje e rëndë nga neni 173 parag. 1 nënparag. 1.5, mbajtja në pronësi, kontroll ose posedim të paautorizuar të armëve nga neni 366 par.1, dhe manipulimi me prova nga neni 389 par.1 të Kodit Penal të Republikës së Kosovës.
31-vjeçari Visar Cengu u qëllua për vdekje në orët e para të mëngjesit nga Hoxha. Shkak për sherrin dyshohet se është bërë refuzimi për pagesën e faturës 400 euro nga të rinjtë nga Kukësi. Sipas dëshmitarëve në vendin e ngjarjes në fillim ata janë zënë me grushte. Pasi Cengu me miqtë e tij kanë dalë nga lokali, Dibran Hoxha ka dalë po ashtu dhe ka hapur zjarr ndaj tyre. Cengu ndërroi jetë pak minuta pasi u largua me urgjencë nga vendi i ngjarjes ndërsa një nga shokët e tij u plagos, tjetrin fatmirësisht nuk e preken plumbat. Bashkë me Hoxhën në polici janë shoqëruar dhe 5 persona të tjerë që dyshohet të kenë lidhje me ngjarjen.
