TIRANË– Gjyqi ndaj Svetlana Timofeeva, ruses së akuzuar për spiunazh në Gramsh është shtyrë. Seanca ishte parashikuar të mbahej këtë të premte por në fund u vendos që ajo të shtyhet dhe të zhvillohet më 4 prill ora 14:00, pasi mbrojtja kërkoi kohë për njohjen me konkluzionet përfundimtare në gjuhën ruse.
Svelana Timofeeva kërkoi në seancën e shkuar të njihet me kërkesë në gjuhën ruse për lejimin e ekstradimit. Sot mbrojtja kërkoi kohë për njohjen me konkluzionet përfundimtare dhe gjykata vendosi që seanca e radhës të zhvillohet në 4 prill 2023.
Timofeeva akuzohet për spiunazh nga autoritetet shqiptare, ka kërkuar azil politik në Shqipëri. 33-vjeçarja nga Rusia u arrestua më 20 gusht të vitit 2022 së bashku me dy te huaj të tjerë, Mikhail Zorin, 23 vjeç nga Rusia dhe Fedir Aplatov nga Ukraina, pasi tentuan të hynin në ambientet e uzinës së armëve në Gramsh dhe hodhën sprai neuro-paralizues ndaj dy ushtarëve që ruanin objektin ushtarak.
