TIRANË– “E ha ai që kapet dhe ai që kapet duhet ta hajë. Kjo është historia, nuk kam tendencën ta asociojë Kukësin dhe trashëgiminë e asaj krahine me atë ndodhi që do ishte e pakëndshme pavarësisht qytetit ku ndodhi. Çdokush që asocion me Kukësin me atë ndodhi, bën gabim për mendimin tim”. Është ky mendimi i ekspertit të ekonomisë Dritan Shano në emisionin “Stay Tuned” me moderatoren Valbona Mhilli në MCN Tv, lidhur me videon erotike në fokus të së cilës është ish-kryebashkiaku i Kukësit, Safet Gjici.
Ai shton se zyra është e qytetarit, jo e personazhit që ulet në të dhe se duhet ruajtur një dekor dhe protokoll.
“Ne jemi mësuar me një elitë politike që nuk e ka problem të regjistrojë pjesën e vetë që bën edhe mes vetit, ti regjistrojë me audio dhe video, pos kësaj “elite politike” janë dhe ata që mëtojnë tenderat të cilët e përdorin fort këtë element të spiunazhit. Nuk do çuditesha fare të prodhoheshin video nga më të ndryshmet. Në këtë vend regjistrohet çdo gjë. Biseda, seksi, me përjashtim të pronës private, e cila në fakt është themeli i shtetit.”
Ndërsa vizitën e ish-Presidentit amerikan Bill Clinton në Tiranë e sheh si të mirëpritur, duke vlerësuar rolin që ka luajtur lidhur me konceptin e kombit shqiptar.
“Ky vend dominohet nga personalitete të forta, prandaj është në këtë gjendje të mjeruar ku është, kaq i prapambetur dhe primitiv në raport me botën moderne. Nuk ka pse mbetemi pre e xhelozive të njërit apo tjetrit, po të ndjekim atë protokoll që ka shteti shqiptar dhe në majë të protokollit të shtetit shqiptar qëndron Presidenti, jo Kryeministri. Pastaj ato xhelozitë unë nuk shkoj atje se e ka thirrur Rama e me radhë, këto janë qesh hunda buzën. Këto nuk i shërbejnë as Shqipërisë dhe as shqiptarëve, na bëjnë të dukemi para syve të botës, se ne po kërkojmë të pranohemi në botën e zhvilluar dhe ne duhet të tregojmë me vepra se jemi njerëz që i kemi kapërcyer instinktet tribale dhe feudale dhe jemi kthyer në një shoqëri moderne.”
