TIRANË– Duke filluar që nga kjo e mërkurë do të hyjë në fuqi harta e re gjyqësore, ka qenë KLGJ ajo që u ka dërguar vendim të formës së prerë Gjykatave të Apelit në rrethe dhe duke nisur nga sot ato do të mbyllen dhe do të funksionojë vetëm një Apel në Tiranë, ndërsa mësohet se 13 gjykatat e Shkallës së Parë do të mbyllen më datë 1 maj. Për këtë çështje ka reaguar edhe Kryetarja e Këshillit të Lartë Gjyqsor, ku Naureda Llagami në një prononcim për mediat është shprehur se Harta e Re Territoriale do tu ofrojë qytetarëve një shërbim cilësor. Ndërsa ka theksuar se të gjitha çështjet që e kanë filluar gjykimin në gjykatat e apelit në rrethe do e vazhdojnë gjykimin atje.
“KLGJ pavarësisht masave që mori me rritjen e kuotave për magjistratët e rinj, u pa e udhës që përveç këtyre masave duhej te merreshin masa edhe strukturore, pra harta e re gjyqësore. Ishte një tendencë që sot po shkojnë gjithë vendet e zhvilluara, rritjen e shërbimit të cilësisë që japin këto gjykata. Synojmë që të kemi gjykata më të mëdha, të profilizuara me gjyqtarë të mirë që do ndikojë tek cilësia e vendimmarrjes që do ketë impakt tek publiku. Nuk ishte procesi i lehtë, na mori 3 vjet. Nuk ishte diçka e thjeshtë, pasi përballeshim çdo ditë me prioritete. Nuk do ishte bërë nëse ne s’do kishim edhe mbështetjen e partnerëve tanë. Me gjithë kundërshtitë dhe dilemat arritëm ta miratonim se e kuptuam që ishim në një rrugë pa kthim. Sot është koncept shërbimesh, nuk mund të diskutim për shërbime nëse nuk flasim për kosto dhe optimizim të burimeve njerëzore. Çdo çështje që ka filluar gjykimin, do vazhdojë gjykimin, 1868 çështje. 27 mijë çështjes që janë bashkuar, kanë emigruar dhe janë gati për tu rishortuar në trupën gjyqësore prej 25 vetash,”- tha Llagami.
Ndërkohë kujtojmë se harta e re gjyqësore e hartuar nga Këshilli i Lartë Gjyqësor, hasi ne kundërshtimet e avokatëve, të cilët bojkotuan për disa javë edhe seancat.
