TIRANË– Personi që shihni në foto është Albano Velo, 30-vjeçari që ekzekutoi pasditën e 16 dhjetorit të vitit të shkuar biznesmenin Edmond Papa në Selitë. Ai është vënë në pranga nga Policia pas një ndjekje disa ditëshe ndërkohë bashkëpunëtori i tij në krim është shpallur në kërkim. 30-vjeçari nga Permeti bashkë me bashkëpunëtorin e tij e kanë ndjekur Papën për disa ditë më radhë derisa gjetën momentin e përshtatshëm kur ai u ul të pijë kafen në një lokal afër shtëpisë së vëllait. Identifikimi i tyre erdhi falë kamerave të sigurisë në zonë të cilat u sekuestruan nga grupi hetimor i ngritur për ngjarjen.
Dyshohet se vrasja e Edmond Papës të ketë ardhur për larje hesapesh. Albano Velo ishte mik me të ndjerin Aleksandër Sadikaj, i cili u ekzekutua në një atentat mafioz me eksploziv teksa udhëtonte me makinë. 6 muaj pasi i vranë shokun dyshohet se Velo ka marrë hak duke vrarë biznesmenin. Ende nuk dihet çfarë lidhhje ka pasur Papa me Sadikajn dhe pse pas vrasjes së biznesmenit dyshohej se Sadikaj dhe Papa ishin takuar në hotelin e lkëtij të fundit tre ditë përpara se Sadikaj të ekzekutohej pranë TEG.
“Molla e Sherrit” dyshohet të ketë qenë një sasi prej 700 kg drogë, e cila ka humbur. Pas vrasjes së Papajt erdhi dhe ekzekutimi i dy shqiptarëve në Greqi, Kreshnik Çerçizaj dhe Armando Ogrenja. Policia ende po heton të gjitha pistat dhe lidhjen që viktimat kanë pasur mes tyre dhe se kush ishte ekzekutori i shqiptarëve në Greqi.
Vrasja e Edmond Papës
Edmond Papa u ekzekutua me 9 plumba brenda një lokali në zonën e Selitës në Tiranë më 16 dhjetor të vitit të shkuarshumë pak metra larg nga shtëpia e të vëllait ku kiishte dhe nënën e sëmurë që e kishte sjellë për ta vizituar. Autorët e kishin ndjekur “këmba këmbës” prej ditësh dhe kishin pritur momentin e duhur për të larë hesapet. Autori hyri qetësisht në lokal dhe qëlloi plot 9 herë në drejtim të tij duke e lënë të rrëzuar në tokë. Pak minuta më pas ai ndërroi jetë. Më pas autori ka dalë nga lokali dhe ka ikur në fund të rrugës ku e ka pritur bashkëpunëtori i tij dhe më pas të dy do të largoheshin pa lënë gjurmë. Kapja e tyre erdhi falë kamerave të sigurisë në zonë të cilat u sekuestruan nga Policia.
Vrasja e Aleksandër Sasdikajt
27-vjeçari Aleksandër Sadikaj u ekzekutua më 11 qershor të vitit të shkuar në zonën e njohur si rrethrrotullimi i TEG-ut. Ai ishte pronar i një resorti hipizmi. Kur ishte duke udhëtuar në aksin Sauk-TEG, makina me targa AB077PO me të cilën ai po lëvizte shpërtheu. Në të ishte vendosur një sasi eksplozivi që e hodhi në erë bashkë me Sadikajn brenda. Bomba me celulare dyshohet se i është vendosur nga persona që kishin akses te makina. Nga shpërthimi Sadikaj humbi 2 gjymtyrët e poshtëm, këmbët, dhe ia doli që të dilte vetë nga makina e të dërgohej në spital, por nuk arriti t’i mbijetonte plagëve të rënda.
Vrasja e dy shqiptarëve në Greqi
Kreshnik Çerçizaj dhe Armando Ogrenja, të dy emra të njohur për policinë u ekzekutuan në një atentat mafioz më 18 dhjetor të viti të shkuar. Dy shqiptarët ishin ulur në një lokal në një nga zonat më të njohura dhe të frekurentuara të Athinës ku ekzekutori u afrua qetësisht dhe qëlloi në drejtim të tyre. 6 plumba preken në kokë e kraharor Kreshnik Çerçizajn, i cili ndërroi jetë në vend ndërsa një plumb preku në bark Armando Ogrenjën, i cili ndërroi jetë pak minuta më pas në spital. Sipas ekspertizës për shkak të një ataku kardiak dhe jo nga plumbi i marrë.
Mbetet ende një mister i madh lidhja që tre viktimat mund të kenë pasur me njëri tjetri-tjetrin çfarë i lidhte bashkë dhe kush të ketë qenë shkaku zyrtar i ekzekutimit të tyre. Por deri më tani ajo që duket I bën bashkë viktimat është sasia e 700 kg drogë të humbura e ku fajtori nuk dihet.
